संविधानाने दिलेले कर्तव्य, जबाबदारी आनंदाने पार पाडूया !
संविधान दिनानिमित्त उमेश गाळवणकर यांचे आवाहन
जगातील सर्वात मोठे लिखित संविधान म्हणजे भारतीय राज्यघटना. या संविधानाने दिलेली जबाबदारी, कर्तव्य आनंदाने पार पाडूया आणि देश बलसागर बनवूया. असे जेव्हा होईल तेव्हाच खऱ्या अर्थाने संविधान दिन साजरा केल्याचा आनंद- समाधान मिळेल. असे प्रतिपादन बॅ. नाथ पै शिक्षण संस्थेचे चेअरमन उमेश गाळवणकर यांनी केले. बॅरिस्टर नाथ पै शिक्षण संस्थेमध्ये संविधान दिनानिमित्त आयोजित कार्यक्रमात अध्यक्ष स्थानावरून बोलत ते होते.
संविधान दिनानिमित्त बॅरिस्टर नाथ पै शिक्षण संस्थेमध्ये विशेष कार्यक्रमाचे आयोजन करण्यात आले होते. यावेळी व्यासपीठावर संस्थेच्या सीईओ अमृता गाळवणकर, फिजिओथेरपी महाविद्यालयाचे प्र. प्राचार्य प्रत्युषरंजन बिस्वाल, महिला व रात्र महाविद्यालयाचे प्राचार्य अरुण मर्गज, बी. एड. महाविद्यालयाचे प्राचार्य परेश धावडे, नर्सिंग महाविद्यालयाच्या प्राचार्य कल्पना भंडारी, सेंट्रल स्कूलच्या प्राचार्य चैताली बांदेकर, इत्यादी उपस्थित होते.
यावेळी बोलताना उमेश गाळवणकर म्हणाले, संविधानाने घालून दिलेल्या आचारसंहितेचे पालन करूया. देशाच्या अखंडततेसाठी एकत्रितपणे प्रयत्न करूया. देशाचा विकास आणि सुरक्षितता अबाधित राहण्यासाठी निष्ठेने कार्य करूया. आणि ज्यांच्या त्यागामुळे आज स्वतंत्र भारतामध्ये सन्मानाने जगत आहोत त्या सर्व हुतात्म्यांचा मनात स्मरण ठेवून त्यांच्या प्रति आदर व्यक्त करूया. स्वातंत्र्य समता आणि बंधुता यांचे पाईक होऊया. तरच संविधानास अभिप्रेत असणाऱ्या राष्ट्र उभारणीचे आपण घटक होऊ शकतो. असं सांगून संविधानाला मानवंदना दिली.
कार्यक्रमाच्या प्रस्तावनेमध्ये प्रा अरुण मर्गज यांनी संविधानाच्या निर्मिती मागचा हेतू व एकंदर संविधानाची रचना थोडक्यात कथन करून आपल्या भारताच्या संविधानाचे वेगळेपण स्पष्ट केले. तर सौ. अश्विनी परब यांनी संविधानाच्या उद्देशिकेचे वाचन केले.
एनसीसी डे निमित्त यावेळी एनसीसी गीताचे व राष्ट्रगीताचे सुद्धा सर्वांनी सामूहिक गायन केले. त्यानंतर कार्यक्रमाची सांगता करण्यात आली. कार्यक्रमाचे सूत्रसंचालन मंदार जोशी यांनी केले.
