तळेरे येथील वामनराव महाडिक विद्यालयात संगणक प्रशिक्षण केंद्राचे उद्घाटन
तळेरे -वामनराव महाडिक माध्यमिक विद्यालय व कनिष्ठ कला, वाणिज्य व विज्ञान महाविद्यालय, तळेरे तसेच जी. बी. प्लस टेक्नॉलॉजीज कॉम्प्युटर व टायपिंग इन्स्टिट्यूट यांच्या संयुक्त विद्यमाने स्थापन करण्यात आलेल्या संगणक प्रशिक्षण केंद्राचे उद्घाटन नुकतेच उत्साहात व उपस्थितीने पडले. ग्रामीण भागातील विद्यार्थ्यांसाठी तंत्रज्ञान शिक्षणाची नवी दारे उघडणारा हा उपक्रम असल्याचे उद्घाटन प्रसंगी मान्यवरांनी गौरवोद्गार काढले.
कार्यक्रमाचे उद्घाटन मुख्य कार्यकारी अधिकारी तथा चिटणीस श्रीकृष्ण (दादा)खटावकर यांच्या हस्ते दीपप्रज्वलन करून करण्यात आले. प्रारंभी मान्यवरांच्या हस्ते फित कापून केंद्राचे लोकार्पण करण्यात आले.यानंतर उपस्थित पाहुण्यांचे स्वागत व परिचय प्राध्यापकांनी करून दिले.
आपल्या भाषणात श्री. खटावकर म्हणाले की, “तळेरेसारख्या ग्रामीण भागात संगणक शिक्षणाची आधुनिक सुविधा उपलब्ध होणे ही अत्यंत आनंदाची बाब आहे. आजच्या स्पर्धेच्या युगात तंत्रज्ञानविषयक कौशल्यांशिवाय करिअर घडवणे कठीण आहे. या केंद्राच्या स्थापनेमुळे विद्यार्थ्यांना प्रत्यक्ष संगणक हाताळण्याची संधी मिळेल आणि त्यांच्या रोजगाराच्या संधींमध्येही मोठी वाढ होईल.” त्यांनी संस्थेच्या कामाचे कौतुक करत पुढील शैक्षणिक विकासासाठी सहकार्याचे आश्वासन दिले.
तसेच विद्यालयाचे प्राचार्य अविनाश मांजरेकर यांनी आपल्या मनोगतात सांगितले की, “शाळेतील विद्यार्थ्यांना गुणवत्तापूर्ण शिक्षण देण्याच्या उद्देशाने शाळेने विविध शैक्षणिक, सांस्कृतिक व तांत्रिक उपक्रम राबवले आहेत. संगणक प्रशिक्षण केंद्रामुळे विद्यार्थ्यांना तंत्रज्ञानाचा सक्षम वापर करता येईल आणि ते भविष्यातील डिजिटल गरजांशी स्पर्धा करू शकतील.” त्यांनी संस्थेला व जी. बी. प्लस टेक्नॉलॉजीज टीमला सहकार्याबद्दल आभार मानले.
कार्यक्रमास विविध क्षेत्रातील मान्यवरांची उपस्थिती लाभली. यामध्ये मनोज रावराणे (विधानसभा अध्यक्ष, कणकवली मतदारसंघ), दिलीपभाई तळेकर(माजी सभापती, पंचायत समिती), हनुमंत तळेकर (सरपंच,तळेरे),अण्णा खाडये (युवा तालुकाध्यक्ष), गणेश पाताडे (उपसरपंच ,कासार्डे), प्रकाश तिर्लोटकर (तंटामुक्ती अध्यक्ष, कासार्डे), निलेश सोरप (तंटामुक्ती अध्यक्ष, तळेरे) यांचा समावेश होता. सर्व मान्यवरांनी या उपक्रमाचे कौतुक करत विद्यार्थ्यांना डिजिटल युगाशी जोडणारा हा स्तुत्य उपक्रम असल्याचे मत व्यक्त केले.
कार्यक्रमाचे उत्कृष्ट सूत्रसंचालन प्राध्यापक सचिन शेटे यांनी करत संपूर्ण कार्यक्रमाचा वेधक धागा धरून ठेवला. शेवटी सौ. खंडमळे यांनी उपस्थित मान्यवरांचे, शिक्षकांचे, संस्थेचे आणि सर्व सहकाऱ्यांचे आभार मानून कार्यक्रमाची सांगता केली.
