नाटळ ग्रामसभा मारहाण प्रकरणी तिघांना अटकपूर्व जामीन मंजूर

संशयित आरोपीतर्फे ॲड. उमेश सावंत यांचा युक्तिवाद

नाटळ येथील ग्रामसभेत पूर्व वैमनस्यातून फिर्यादी ग्रा.पं. सदस्य दीनानाथ पंढरीनाथ सावंत यांच्या डोकीवर चाकूने जीवघेणा हल्ला केला व किशोर परब, महेंद्र गुढेकर यांना गंभीर जखमी केल्याप्रकरणी उबाठा शिवसेना नाटळ विभागप्रमुख प्रदीप सावंत, ग्रा. पं. सदस्य पद्माकर पांगम व पंढरी पांगम यांना प्रत्येकी २५ हजार रुपयांच्या सशर्त अटकपूर्व जामिन अतिरिक्त सत्र न्यायाधीश व्ही. एस. देशमुख यांनी मंजूर केला आहे. आरोपीतर्फे ॲड. उमेश सावंत यांनी काम पाहिले.
३ जून २०२४ रोजी सकाळी ११.३० वा. नाटळ ग्रामसभा सुरू असताना तंटामुक्त समिती अध्यक्ष गणेश सावंत हा आपण दिलेल्या पत्रावर तात्काळ उत्तर या, असे बोलून तो सरपंचांच्या अंगावर धावून गेला. त्यावेळी फिर्यादी दीनानाथ सावंत हे अडवायला गेले. तेव्हा गणेश याने धारदार चाकूने फिर्यादीच्या डोकीवर वार केले. यावेळी त्याच्यासोबत असलेल्या अभिषण सावंत, पद्माकर पांगम, पंढरी पांगम, प्रदीप सावंत यांनी फिर्यादीला लाबाबुक्क्याने मारहाण केली. साक्षीदार किशोर परब व महेंद्र गुढेकर हे फिर्यादीला सोडविण्यासाठी गेले असताना ही मारहाण झाली होती. त्यानुसार १३ आरोपींविरुद्ध भादंवि कलम ३०७, ३२४, ३२३. ३५२, ५०४, १४३, १४७, १४८ १४९ व पोलीस अधिनियम ३७ (१) १३५ प्रमाणे गुन्हा दाखल करून उर्वरीत आरोपींवर अटकेची कारवाई झाली होती, तसेच त्यांना नंतर जामिनही मंजूर झाला होता. पैकी पंढरी पांगम याचा अटकपूर्व जामीन यापूर्वी फेटाळण्यात आला होता.
या प्रकरणी प्रदीप सावंत, पद्माकर पांगम व पंढरी पांगम यांच्यावतीने दाखल केलेल्या अटकपूर्व जामिन अर्जावर सुनावणी होऊन आरोपीना २५ हजार रुपयांच्या सशर्त अटकुपर्व जामिन मंजुर करताना तपासात सहकार्य करणे, सरकारी पुराव्यात हस्तक्षेप न करणे आदी अटी घालण्यात आल्या आहेत.

दिगंबर वालावलकर कणकवली