कणकवली शहरातील गटारात गडगा कोसळून गटार बंद

मुख्याधिकारी अवधूत तावडे यांच्याकडून तात्काळ दखल

नगरपंचायत कर्मचाऱ्यांकडून गटार मोकळे

कणकवली शहरात पावसाच्या सुरुवातीनंतर पडझडीचे चे सत्र सुरू झाले आहे. आज सकाळी सार्वजनिक बांधकाम उपविभागीय कार्यालयावर झाड कोसळल्यानंतर दुपारी अभ्युदय बँकेच्या मागील भागात असलेल्या गटारात तेथील बाजूचा गडगा कोसळल्याने गटार पाणी वाहतुकीस बंद झाले. याबाबत मुख्याधिकारी अवधूत तावडे यांचे स्थानिक नागरिकांनी लक्ष वेधल्यानंतर त्याची तात्काळ दखल घेत मुख्याधिकारी श्री. तावडे यांनी नगरपंचायत कर्मचाऱ्यांचे पथक घटनास्थळी पाठवले. यामध्ये नगरपंचायत कर्मचारी प्रदीप गायकवाड, विशाल होडावडेकर यांच्यासह अन्य कर्मचाऱ्यांनी सदर गटारातील दगड बाजूला करत गटार पाणी निचरा होण्यासाठी मोकळे केले. त्यामुळे त्या भागातील नागरिकांत समाधान व्यक्त केले जात आहे.

दिगंबर वालावलकर/ कणकवली