दोन सराईत गुन्हेगार आणि एका मटका बुकीची २ वर्षांसाठी हद्दपारी
कुडाळ पोलीस ठाण्याची विशेष कामगिरी
जिल्ह्यात मटका बुकीच्या हद्दपारीची पहिलीच वेळ
कुडाळ पोलीस ठाण्याचे कार्यक्षेत्रातील दोन सराईत गुन्हेगार व एक मटका बुकींना दोन वर्षाकरीता सिंधुदुर्ग, रत्नागिरी व कोल्हापूर जिल्हयातुन हद्दपार करण्यात आले आहे. अशी माहिती कुडाळचे पोलीस निरीक्षक राजेंद्र मगदूम यांनी प्रसिद्धी पत्रकाद्वारे दिली आहे. दरम्यान मटका बुकीला हद्दपार करण्याची कारवाई ही सिंधुदुर्ग जिल्हयातील पहिलीच कारवाई कुडाळ पोलीस ठाण्यामार्फत करण्यात आलेली आहे.
प्रसिद्धीस दिलेल्या पत्रकात म्हटले आहे, सिंधुदुर्ग जिल्हयातील नागरीकांचे जिवीताचे तसेच मालमत्तेस कोणत्याही गुन्हेगाराकडून धोका निर्माण होवु नये. नागरीकांना भयमुक्त असे वातावरणात राहता यावे. या करीता पोलीस अधीक्षक डॉ. मोहन दहीकर, अपर पोलीस अधीक्षक कु. नयोमी साटम व उप विभागीय पोलीस अधिकारी, सावंतवाडी विनोद कांबळे यांनी कुडाळ पोलीस ठाण्याचे हद्दीत सतत गंभीर गुन्हे करणाऱ्या गुन्हेगारांची माहीती संकलित करुन त्यांच्यावर कडक कारवाई करण्याबाबतचे आदेश कुडाळ पोलीस ठाण्याचे पोलीस निरीक्षक राजेंद्र मगदुम यांना दिलेले होते.
त्यानुसार पोलीस निरीक्षक राजेंद्र मगदुम यांनी गेल्या काही वर्षात तसेच सद्यस्थितीत सतत गुन्हे करणाऱ्या गुन्हेगारांची माहीती संकलित केली. त्यानुसार कुडाळ पोलीस ठाण्याचे हददीतील घरफोडी चोरीचे ७ गुन्हे दाखल असणारा अभिलेखावरील सराईत गुन्हेगार अनंत ऊर्फ अक्षय अशोक म्हाडेश्वर, (वय 32 वर्षे, रा. माठेवाडा, कुडाळ), तसेच वाहनाच्या बॅटऱ्या चोरी, गर्दी मारामारीचे गुन्हे दाखल असलेला अभिलेखावरील ४ गुन्हे दाखल असलेला सलीम सादीक सय्यद (वय 38 वर्षे रा. पिंगुळी गुढीपुर, ता. कुडाळ), तसेच अवैध मटका जुगाराचा खेळ खेळणारा व मटका जुगाराचे ४ गुन्हे दाखल असलेला मटका बुकी खलील हुसेन वाडीकर (वय ६१ वर्षे रा. कोलगांव, फणसवाडी ता. सावंतवाडी जि. सिंधुदुर्ग) त्याचेविरुध्द हद्दपारीची कारवाई करण्याकरीता स्वतंत्र अहवाल उप विभागीय दंडाधिकारी, कुडाळ यांचेकडे पाठविण्यात आले होते. त्यानुसार उपविभागीय दंडाधिकारी, कुडाळ यांच्या न्यायालयात सदर प्रस्तावाची सुनावणी होवुन नमुद सराईत गुन्हेगार अनंत ऊर्फ अक्षय अशोक म्हाडेश्वर, (वय 32 वर्षे, रा. माठेवाडा, कुडाळ), सलीम सादीक सय्यद (वय 38 वर्षे रा. पिंगुळी गुढीपुर, ता. कुडाळ), आणि खलील हुसेन वाडीकर (वय ६१ वर्षे रा. कोलगांव, फणसवाडी ता. सावंतवाडी जि. सिंधुदुर्ग) यांना दोन वर्षाकरीता सिंधुदुर्गसह लगतच्या रत्नागिरी व कोल्हापूर या तीन जिल्हयातुन हद्दपार करण्याचे आदेश पारीत करण्यात आलेले आहेत.
त्यानुसार नमुद गुन्हेगारांना हद्दपारीचे आदेशाची प्रत कुडाळ पोलीस ठाण्यामार्फत बजावणी करण्यात आलेली असुन नमुद आरोपी हे हद्दपारीचे कालावधीत गोवा राज्यात राहणार असल्याने त्यांना गोवा राज्यात पाठविण्यात आले. मटका बुकीला हद्दपार करण्याची कारवाई ही सिंधुदुर्ग जिल्हयातील पहिलीच कारवाई कुडाळ पोलीस ठाण्यामार्फत करण्यात आलेली आहे.
ही कारवाई ही पोलीस अधीक्षक डॉ मोहन दहीकर, अपर पोलीस अधीक्षक कु. नयोमी साटम व मा उप विभागीय पोलीस अधिकारी, सावंतवाडी विनोद कांबळे यांचे मार्गदर्शनाखाली कुडाळ पोलीस ठाण्याचे पोलीस निरीक्षक राजेंद्र मगदुम, पोलीस अंमलदार, कृष्णा केसरकर, उषा आईर, सुजाता तेंडोलकर यांनी केलेली आहे. अशी माहिती प्रसिद्धीस दिलेल्या पत्रकात आहे.
