भजनी कलाकार संस्था सिंधुदुर्ग आयोजित सावंतवाडी आणि वेंगुर्ला तालुक्याची बैठक संपन्न.

सभासद नोंदणीसाठी उत्स्फूर्त प्रतिसाद.

भजन कलेला शासन दरबारी राजाश्रय मिळवून देण्यासाठी संस्थेचा प्रयत्न-संस्थाध्यक्ष बुवा संतोष कानडे

कणकवली/प्रतिनिधी

भजनी परंपरेचा गौरव जपण्यासाठी, कलाकारांचे हक्क प्रस्थापित करण्यासाठी आणि या कलेला शासनमान्यता मिळवून देण्यासाठी “भजनी कलाकार संस्था सिंधुदुर्ग” ही संस्था नुकतीच अधिकृतरीत्या नोंदणीकृत झाली असून,जिल्ह्यातील भजनी कलाकारांसाठी ही एक ऐतिहासिक आणि अभिमानाची घटना ठरली आहे.
संस्थेचे प्रमुख उद्दिष्टे अत्यंत व्यापक असून भजनी कलाकारांना शासनस्तरावर अनुदान मिळवून देणे, “स्वातंत्र्य भजन सदन” उभारणी, शासकीय ओळखपत्रांची व्यवस्था,शाळांमध्ये संगीत शिक्षकांची नेमणूक,बाल भजन शिबिरे,जिल्हास्तरीय पुरस्कार वितरण,संगीत वाद्यांची तरतूद तसेच भजन स्पर्धांसाठी एकच नियमावली तयार करणे अशा अनेक ठोस उपक्रमांद्वारे भजनी कलेचे संवर्धन करण्याचा निश्चय संस्थेने केला आहे.
संस्थेची सावंतवाडी आणि वेंगुर्ला तालुक्याची बैठक नुकतीच मळगाव येथील पेडणेकर हॉल सावंतवाडी येथे संपन्न झाली असून तालुक्यातील भजनी कलाकार मोठ्या संख्येने उपस्थित होते प्रसंगी संस्थेची अधिकृत ओळख,उद्दिष्टे आणि पुढील दिशा सर्वांसमोर ठेवण्यात आली.भजनी कलाकारांना भेडसावणाऱ्या अडचणी आणि त्यांच्या निवारणासाठी उपस्थित कलाकारांशी खुली चर्चा करण्यात आली.यावेळी संस्थेच्या मार्फत चालू असलेले कार्य तसेच जिल्ह्यात निर्माण झालेली नवी चळवळ लक्षात घेता सावंतवाडी तालुक्यातून भजनी कलाकारांनी सभासद नोंदणीसाठी उत्स्फूर्त प्रतिसाद दाखविला.
कार्यक्रमाला प्रमुख अतिथी म्हणून प्रमोदजी कामत,प्रेमानंद देसाई, संदीप नाईकधुरे , ज्ञानेश्वर मिस्त्री, हेमंत तवटे, कृष्णा राऊळ, दीपक पाळेकर, राजा सामंत, बाळू कांडरकर, सुरेश गावडे,नितीन नाईक,रुपेंद्र परब तसेच मळगाव ग्रामपंचायत सरपंच हनुमंत पेडणेकर आदी मान्यवर उपस्थित होते.