हळवल फाट्यावर अपघात प्रकरणी नागरिकांनी महामार्ग धरला रोखून

महामार्गावर दोन्ही बाजूला लांबच लांब वाहनांच्या रांगा

ट्रकने दुचाकीला धडक दिल्याने दोघे गंभीर

मुंबई गोवा महामार्गावरील गडनदी पुलावरून कुडाळच्या दिशेने भरधाव
वेगाने जाणाऱ्या ट्रकने दुचाकीला फरफटत नेले. रात्री सव्वा आठच्या सुमारास ही घटना घडली. यात दहा वर्षाच्या मुलासह त्याची आई गंभीर जखमी झाली आहे. घटनेचे वृत्त समजताच माझी जि प अध्यक्ष गोट्या सावंत, माजी नगराध्यक्ष समीर नलावडे यांच्यासह नागरिकांनी महामार्ग रोखून धरला. हा ट्रक गोव्याच्या दिशेने जात होता. तर दुचाकीवरील आई आणि चौथीमध्ये शिकणारा मुलगा हे हळवल येथे जाणार होते. हळवल फाटा येथे ट्रकने दुचाकीला पंचवीस ते तीस फुट फरपटत नेले. त्यानंतर ट्रक थांबवून ट्रक चालक पसार झाला. या दरम्यान ज्येष्ठ पत्रकार आबा खवणेकर आणि त्यांचे सहकारी कुडाळच्या दिशेने जात होते. त्यांना ही बाब समजताच त्यांनी तातडीने अपघामधील जखमी आई आणि तिच्या मुलाला आपल्या कारमधून शहरातील खासगी रूग्णालयात दाखल केले. मात्र दोहोंची प्रकृती गंभीर आहे.
महामार्गावरील गडनदीपुलालगतच्या हळवल फाटा येथे सातत्याने अपघात होत आहेत. मात्र महामार्ग विभाग त्यावर कोणतीही ठोस कारवाई करत नसल्याच्या निषेधार्थ कणकवलीकरांनी एकत्र येऊन रास्ता रोको सुरू केला आहे. यात महामार्गावर दोन्ही बाजूंनी वाहनांच्या मोठ्या रांगा लागल्या आहेत. महामार्गावर पोलीस घटनास्थळी दाखल झाले आहेत प्रांताधिकारी व तहसीलदार येत नाही तोपर्यंत महामार्ग वरून हटणार नाही असा इशारा नागरिकांनी दिला आहे.

दिगंबर वालावलकर/ कणकवली