वनसंज्ञेमधील मधील वृक्षतोड करून कार्यकारी अभियंत्यांकडून नियमांचे उल्लंघन

माजी आमदार परशुराम उपरकर यांचा अजयकुमार सर्वगोड यांच्यावर पुन्हा एकदा गंभीर आरोप

ठेकेदाराना कामे देऊन पैसे गोळा करण्याचा आरोप

कणकवली रेल्वे स्टेशन सुशोभीकरण तसेच नुतनीकरण आचारसंहितेपुर्वी करण्याचे आश्वासन कार्यकारी अभियंता अजयकुमार सर्वगोड यांनी दिले होते. मात्र अद्याप कणकवली रेल्वे स्टेशनसह जिल्ह्यातील अन्य रेल्वे स्टेशन सुशोभीकरणचे काम अपूर्ण आहे.कार्यकारी अभियंता सर्वगोड हे जनतेची फसवणूक करून जनतेला उल्लू बनवत आहेत. असा आरोप माजी आम. परशुराम उपरकर यांनी केला.
कणकवली येथील आपल्या संपर्क कार्यालयात आयोजित पत्रकार परिषदेत माजी आमदार परशुराम उपरकर बोलत होते.

श्री. उपरकर म्हणाले,8 मार्च रोजी सार्वजनिक बांधकाममंत्री रवींद्र चव्हाण यांनी ऑनलाइन केलेल्या 29 भूमीपूजनांपैकी कणकवली आचरा मार्गावरील वरवडे येथील रस्ता रुंदीकरणाचे काम भूमिपूजन आधी महिनाभर सुरू केले.मात्र त्या कामातही वनसंज्ञेमधील वृक्षतोड केली आहे. स्टेज वन स्टेज टू ची परवानगी न घेता ही वृक्षतोड करण्यात आली आहे. याची तक्रार वनविभागाचे वरिष्ठ अधिकारी नागपूर येथे केली असल्याचे माजी आमदार परशुराम उपरकर यांनी सांगितले. तसेच या मार्गावर रस्ता भरावासाठी वापरलेल्या नदीतील रवाळी वर दंडात्मक कारवाई करण्यासाठी कणकवली तहसीलदार यांच्याकडे तक्रार केली आहे.पुलांची कामे करताना सीआरझेड व एमसिझेडची परवानगी घ्यावी लागते, जी कार्यकारी अभियंता सर्वगोड यांनी घेतलेली नाही. ठेकेदारांना कामे देऊन पैसे गोळा करण्याचे काम ते करत आहेत. कार्यालयात अनुपस्थित राहत कार्यकारी अभियंता सर्वगोड मुंबई दौरे करत आहेत. 2, 3, 6 आणि 7 फेब्रुवारी रोजी मी स्वतः कणकवली विभागीय कार्यालयात भेटीसाठी गेलो असता सर्वगोड मुंबई येथे गेल्याचे सांगण्यात आले. सर्वगोड यांच्या मुंबई दौऱ्याबाबत माहिती मागितली असता चीफ इंजिनिअर यांनी व्हॉट्सॲपवर मला मेसेज केला. माहिती अधिकारात मागितलेली माहिती न देता लपवण्याचा प्रयत्न सर्वगोड करत आहेत. मुंबईत कार्यालयीन कामकाज सांगून सर्वगोड मंत्र्यांच्या एका पीए ला भेटतात. त्याचीही माहिती उजेडात आणणार असल्याचे परशुराम उपरकर यांनी सांगितले.

कणकवली प्रतिनिधी