भाजपकडून होणारी मतांची चोरी आणि खरेदी मित्रपक्षकडूनच उघड

मनसे जिल्हाउपाध्यक्ष कुणाल किनळेकर यांची भाजपवर टीका

निवडणूकित पैशाचा वापर करून निवडणूक जिंकून प्रत्यक्षात कामावर मते मिळवतो, अशा बाता मारणाऱ्या भाजपचा त्यांच्याच मित्रपक्षाने पर्दाफाश केला आहे. शिंदे शिवसेना पक्षाकडून मालवण मधील पैसे पकडून राज्यातील प्रमुख सत्ताधारी भारतीय जनता पक्षा मार्फत होणारी मतांची चोरी आणि खरेदी सिद्ध करून बनावट विकासाचा बुरखा आमदार निलेश राणे यांनी टराटरा फाडला अशी टीका मनसे जिल्हा उपाध्यक्ष कुणाल किनळेकर यांनी केली आहे.
प्रसिद्धीस दिलेल्या पत्रकात कुणाल किनळेकर म्हणतात, महाराष्ट्रातील विधानसभा निवडणुकीनंतर राजसाहेब ठाकरे यांनी प्रमुख सत्ताधारी भाजप पक्षामार्फत निवडणूक आयोगाला हाताशी धरून होणारी मतांची चोरी, बोगस मतदार व पैसे देऊन मतांची खरेदी असे आरोप केले होते. त्यानंतर होऊ घातलेल्या नगरपरिषदा व नगरपंचायतींच्या निवडणुकांमध्ये सत्ताधारी पक्षातील आमदार निलेश राणे यांनी मालवण येथे भारतीय जनता पक्षाच्या पदाधिकाऱ्यांमार्फत मतदारांना वाटण्यासाठी आणलेले पैसे पकडून देऊन हे सिद्ध केले. आणि म्हणूनच सिंधुदुर्गच्या जनतेने आता खरोखरच विचार करण्याची गरज आहे की आपण यापूर्वी निवडून दिलेल्या लोकप्रतिनिधींनी प्रत्यक्षात स्वतःचा विकास केला आहे का आपल्या प्रभागाचा विकास केला आहे तो. निवडणूकी पुरती पोकळ आश्वासने द्यायची आणि पैसे वाटून निवडून यायचं.याला योग्य वेळी मतदारांनी आळा न घातल्यास भविष्यात केवळ नेते आणि त्यांच्या कार्यकर्त्यांचाच विकास झालेला दिसेल.
मालवण मध्ये निवडणुकीदरम्यान पैसे वाटप करणाऱ्या सत्ताधारी भाजपाच्या कार्यकर्त्यांची धरपकड करत आमदार निलेश राणे यांनी तक्रार करून सुद्धा अद्याप पर्यंत कारवाई देखील झालेली नाही. त्यामुळे निवडणूक आयोग व पोलीस प्रशासन हे भारतीय जनता पक्षाच्या हातचे कटपुतली बाहुलेच झालेले असल्याचा आरोप मनसे उपजिल्हाध्यक्ष कुणाल किनळेकर यांनी केला आहे.