कुडाळ येथील प्रक्षोभक भाषण प्रकरणी आमदार भास्कर जाधव यांची निर्दोष मुक्तता
भारतीय जनता पार्टीचे नेते व माजी केंद्रीय मंत्री, खासदार नारायण राणे यांचे विषयी जनमानसात बदनामी, अब्रुनुकसानीकारक तसेच प्रक्षोभक व चिथावणी देणारी वक्तव्ये करुन तसेच शिवसेना उध्दव बाळासाहेब ठाकरे पक्षात व भारतीय जनता पार्टी या दोन पक्षांमध्ये दंगे घडवून आणण्याचे उद्देशाने भाषण केल्याबाबत आमदार भास्कर जाधव यांची कुडाळ न्यायालयाने निर्दोष मुक्तता केली आहे. संशयितांच्यावतीने अॅड.हितेश कुडाळकर, अॅड. केळकर यांनी न्यायालयात काम पहिले.
याबाबत ऍड. हितेश कुडाळकर यांनी दिलेल्या माहितीनुसार दिनांक १८/१०/२०२२ रोजी ११.०० ते दुपारी २.०० वा. च्या मुदतीत शिवसेना उध्दव बाळासाहेब ठाकरे पक्षाचे नेते तसेच महाविकास आघाडीचे घटक पक्ष यांनी मिळून कुडाळ मालवण मतदार संघाचे आमदार वैभव नाईक यांचेविरुध्द चुकीच्या पध्दतीने लाचलुचपत प्रतिबंधक विभागाकडून चौकशी केल्याने मोर्चा काढून व महिला व बाल रुग्णालय कुडाळ येथे सभेचे आयोजन करुन त्या सभेमध्ये गुहागरचे आमदार भास्कर जाधव यांनी भारतीय जनता पार्टीचे नेते व माजी केंद्रीय मंत्री नारायण राणे यांचे विषयी जनमानसात बदनामी, अब्रुनुकसानीकारक तसेच प्रक्षोभक व चिथावणी देणारी वक्तव्ये करुन तसेच शिवसेना उध्दव बाळासाहेब ठाकरे पक्षात व भारतीय जनता पार्टी या दोन पक्षांमध्ये दंगे घडवून आणण्याचे उद्देशाने भाषण केले, अशी फिर्याद तुकाराम साईल यांनी कुडाळ पोलीस ठाणे येथे दाखल केली होती.
त्यानुसार आमदार भास्कर जाधव, विद्यमान आमदार गुहागर मतदार संघ तथा माजी मंत्री महाराष्ट्र राज्य यांचेविरुध्द नियमित फौजदारी केस भा.द.सं चे १५३,५०५(१) (c), ५००, ५०४ कलम प्रमाणे गुन्हा दाखल करून न्यायालयात दोषारोप पत्र दाखल करण्यात आले होते. कुडाळ येथील मे. दिवाणी न्यायालयात सदर खटला सुरू होता. या वेळी अनेक साक्षीदार तपासण्यात आले. संशयितांच्यावतीने अॅड.हितेश कुडाळकर, अॅड. केळकर यांनी न्यायालयात काम पहिले. त्यांनी केलेला युक्तिवाद ग्राह्य मानून कुडाळ येथील मे. दिवाणी न्यायाधीश जी.ए.कुलकर्णी यांनी आमदार भास्कर जाधव यांची २७/११/२०२५ रोजी निर्दोष मुक्तता केली आहे.
