चिंदर गावची देव डाळपस्वारी २७ नोव्हेंबर पासून….!
आचरा-अर्जुन बापर्डेकर
मालवण तालुक्यातील चिंदर गावची देव डाळपस्वारी गुरुवार २७ नोव्हेंबर पासून सुरु होतं आहे. गुरुवार २७ नोव्हेंबरला संध्याकाळी देव डाळपस्वारी श्री देव रवळनाथ मंदिर येथून प्रस्थान करून सातेरी मंदिर, विठलादेवी यांची भेट घेऊन रात्री उशिरा श्री आकारी ब्राम्हण देव मंदिर येथे वस्तीला राहणार आहेत. दुसऱ्या दिवशी शुक्रवार २८ नोव्हेंबर रोजी संध्याकाळी श्री आकारी ब्राह्मण देव मंदिर येथून निघून चिंदर बाजार मार्गे रात्री उशिरा श्री देवी पावणाई मंदिर येथे पोहोचणार आहे. श्री देवी पावणाई मंदिर येथे तीन दिवस तीन रात्री थांबून सोमवार १ डिसेंबर रोजी संध्याकाळी देव डाळपस्वारी श्री देवी पावणाई मंदिर येथून प्रस्थान करून संध्याकाळी उशिरा श्री रामेश्वर मंदिर येथे पोहोचणार आहे. गुरुवार ४ डिसेंबर रोजी श्री भगवती माऊली देवीचा यात्रौत्सव व दत्त जयंती उत्सव असून रात्री श्री दत्त मंदिर येथील पालखी प्रदक्षिणा संपल्या नंतर श्रींची स्वारी श्री सातेरी मंदिर येथून रामेश्वर मंदिर येथेवाजत गाजत फटाक्याच्या आतषबाजीत असंख्य जनसमुदायासह रात्रौ उशिरा भगवती माऊली मंदिर येथे पोचणार आहे. भाविकांनी लाभ घेण्याचे आवाहन करण्यात आले आहे.
