देश आणि संविधानाप्रती सजग राहा – डॉ. मोहन दहीकर

बॅ. नाथ पै शिक्षण संस्थेत २६/११ हल्ल्यातील शहिदांना मानवंदना

बॅ नाथ पै शिक्षणसंस्था, ध्येय प्रतिष्ठान, पोलीस, कुडाळ पत्रकार यांचा उपक्रम

मुंबईतल्या बॉम्बस्फोटसारख्या घटना असतील किंवा २६/११ सारखे देशावरचे हल्ले असतील, अशावेळी आपण नागरिक म्हणून सुद्धा सजग राहिलं पाहिजे. सैन्यदल, पोलीस सर्वंठिकणी पोहोचतीलच असं नाही, आपणच आपल्या संविधानाचे रक्षण करण्यासाठी जागृत असलं पाहिजे असं मत जिल्ह्याचे पोलीस अधीक्षक डॉ. मोहन दहीकर यांनी व्यक्त केलं. २६/११ च्या मुंबई वरील दहशतवादी हल्ल्यात शहीद झालेल्या जवानांना आणि हल्यात बळी पडलेल्या नागरिकांना बॅ.नाथ पै शिक्षण संस्थेमध्ये आज मानवंदना देण्यात आली त्यावेळी डॉ. दहीकर बोलत होते.
बॅ. नाथ पै शिक्षण संस्था सिंधुदुर्ग, ध्येय प्रतिष्ठान, कुडाळ पोलीस ठाणे आणि कुडाळ तालुका पत्रकार समिती यांच्या संयुक्त विद्यमाने मुंबई येथे दहशतवादी हल्ल्यात शहीद झालेल्या कर्तव्यदक्ष पोलीस अधिकारी, कर्मचारी तसेच बळी पडलेल्या निष्पाप नागरिक यांना बॅरिस्टर नाथ शिक्षण संस्थेच्या पटांगणावर श्रद्धांजली अर्पण करून मानवंदना देण्यात आली यावेळी पोलीस अधीक्षक डॉक्टर मोहन दहिकर, अपर जिल्हा पोलीस अधीक्षक नयोमी साटम, 58 महाराष्ट्र बटालियनचे सिओ कर्नल अजय राज एल, त्यांचे सहकारी सी एच एम प्रदीप पाटील, बॅरिस्टर नाथ पै शिक्षण संस्थेचे चेअरमन उमेश गाळवणकर सीईओ अमृता गाळवणकर, बॅरिस्टर नाथ पै महिलाआणि रात्र महाविद्यालयाचे प्राचार्य अरुण मर्गज, बी. एड. कॉलेजचे प्राचार्य परेश धावडे, नर्सिंग महाविद्यालयाच्या प्राचार्य कल्पना भंडारी, फिजिओथेरपीचे प्राचार्य प्रत्युष रंजन बिस्वाल, जुनियर कॉलेजचे प्र प्राचार्य मंदार जोशी, कुडाळ तालुका पत्रकार संघाचे अध्यक्ष विजय पालकर उपस्थित होते. सुरुवातीला 58 महाराष्ट्र बटालियनचे सिओ कर्नल अजय राज एल यांनी आणि नंतर पोलीस अधीक्षक डॉ. मोहन दहीकर आणि अपर जिल्हा पोलीस अधीक्षक नयोमी साटम, पुष्पचक्र अर्पण करून शाहिदनं मानवंदना दिली.
यावेळी बोलताना जिल्हा पोलीस अधीक्षक डॉ. मोहन दहीकर यांनी २६/११ चा हल्ला म्हणजे नेमकं काय, याची कहाणीच उपस्थित विद्यार्थ्यांना सांगितली. देशावर असे हल्ले जेव्हा जेव्हा होतात प्रत्येकवेळी सैन्यदल किंवा पोलीस सर्वठिकाणी पोहोचतीलच असं नाही, त्यावेळी आपल्या संविधानाच रक्षण करण्याची जबाबदारी नागरिकांची आहे. भौगोलिक दृष्ट्या आपल्या जिल्ह्याकडे पाहिलं तर मोठा समुद्र किनारा आपल्याला लाभला आहे. त्याठिकाणी अनेक लँडिंग पॉईंट आहेत. अशा लँडिंग पॉईंट वरूनच मुंबई बॉम्बस्फोट, जातीय दंगली यातील साधनसामुग्री, हत्यारे मुंबई पोहचली होती. त्यामुळे स्थानिकांनी अतिशय दक्ष असणं गरजेचं आहे. आपले नाक, कान, डोळे कायमस्वरूपी उघडे पाहिजेत. जे काही लँडिंग पॉईंट आहेत तिथे कोण येत, कोण जात याकडे आपलं लक्ष पाहिजे. आपण सर्व या या देशातले बिनवर्दीचे जवान आहात त्यामुळे देशाच्या आणि संविधानाच्या रक्षणासाठी सजग राहा असं आवाहन डॉ. दहीकर यांनी केलं. बॅरिस्टर नाथ पै शिक्षण संस्थेत गेली सतरा वर्ष या दिवशी शाहिदना मानवंदना दिली जात आहे हे कौतुकास्पद आहे, अशा शब्दात डॉ. दहीकर यांनी बॅ नाथ पै शिक्षण संस्थेचं कौतुक केलं. आज संविधान दिन सुद्धा आहे. प्रत्येकाचं राष्ट्रीय कर्तव्य आहे ते संविधानाने बांधलेले आहे याची आठवण देखील डॉ. दहीकर यांनी उपस्थितांना करून दिली.
58 महाराष्ट्र बटालियनचे सिओ कर्नल अजय राज एल म्हणाले, आजचा दिवस दोन घटनांसाठी महत्वाचा आहे. आज संविधान दिन सुद्धा आहे आणि देशावरचा भ्याड हल्ला सुद्धा याच दिवशी झाला होता. आपल्याला संविधानाने जी अधिकार दिले आहेत त्यापेक्षा आपली जी कर्तव्य आहेत त्याकडे अधिक लक्ष देण्याची गरज आहे. चांगले नागरिक बना, ज्येष्ठांचा आदर करा, मेहनत करा जेणेकरून आपल्या भारताचे २०४७ पर्यंत विकसित राष्ट्राचे स्वप्न लवकर साकार होईल.असा विश्वास अजय राज यांनी व्यक्त केला.
या कार्यक्रमाला बॅरिस्टर नाथ पै महिलाआणि रात्र महाविद्यालय, बी एड कॉलेज, नर्सिंग कॉलेज, फिझिओथेरेपी कॉलेज, ज्युनियर कॉलेज, सिबीएससी स्कुल चे विद्यार्थी, एनसीसी कॅडेट्स, शिक्षक, प्राध्यापक वर्ग, कर्मचारी तसंच कुडाळ तालुका पत्रकार समितीचे सदस्य उपस्थित होते. कार्यक्रमाचे सूत्रसंचालन मंदार जोशी यांनी केलं.