कुडाळ न. पं. च्या विविध प्रकल्पांचे आमदार निलेश राणे यांच्यासमोर सादरीकरण

प्रकल्पांना निधी देणार – आमदार निलेश राणे

कुडाळ शहराच्या विकासाच्या महत्त्वाच्या टप्प्यासाठी आवश्यक असणाऱ्या सुविधा देण्यासाठी आमदार निलेश राणे यांनी पुढाकार घेतला असून नगरपंचायतीच्या नूतन इमारतीसह कचरा प्रकल्प, नळ पाणी योजना यांच्या प्रकल्पांचे सादरीकरण त्यांनी पाहिले आणि या प्रकल्पांसाठी आवश्यक असणारा निधी उपलब्ध करून दिला जाईल, हे नुसते प्रकल्प नाही तर नागरिकांचा विश्वास दृढ करण्याचा आमचा मानस आहे असे आमदार निलेश राणे यांनी सांगितले.
कुडाळ नगरपंचायतीच्या विविध प्रकल्पांना आमदार निलेश राणे यांच्या माध्यमातून मुहूर्त स्वरूप येत आहे त्यांच्या या कामाला सर्व नगरसेवक हातभार लावत आहेत. कुडाळ नगरपंचायतीच्या नूतन इमारतीसाठी काम हाती घेण्यात आले आहे. त्यासाठी इमारतीचे डिझाईनिंग आणि त्याला लागणारा खर्च याबाबत आमदार निलेश राणे यांना सादरीकरण करण्यात आले. तसेच शहरासाठी महत्त्वकांशी असलेला नळ पाणी योजनेचा प्रकल्प त्याचे व घनकचरा व्यवस्थापन प्रकल्प याचे सुद्धा सादरीकरण करण्यात आले. या तिन्ही प्रकल्पांना आवश्यक असणारा निधी नगरपंचायतीच्या अधिकाऱ्यांनी सांगितला. हा निधी उपलब्ध करून देण्यात येईल असा शब्द आमदार निलेश राणे यांनी दिला आहे.
या सादरीकरणावेळी उपनेते संजय आंग्रे, नगराध्यक्ष प्राजक्ता बांदेकर, गटनेता विलास कुडाळकर, नगरसेवक तथा शहर प्रमुख अभिषेक गावडे, राजीव कुडाळकर, नगरसेविका तथा महिला शहर प्रमुख श्रुती वर्दम, सौ. नयना मांजरेकर, चांदणी कांबळी तसेच नगरपंचायतीचे अधिकारी व कर्मचारी उपस्थित होते. आमदार निलेश राणे यांनी नगरपंचायतीमध्ये यापूर्वी आढावा बैठक घेतली होती. या आढावा बैठकीमध्ये विविध प्रकल्पांवर चर्चा झाली होती आणि हे प्रकल्प कसे पूर्ण करता येतील त्यांना मुहूर्त स्वरूप कसे आणता येईल यासाठी त्यांनी प्रयत्न सुरू केले होते आता या प्रकल्पांना मुहूर्त स्वरूप येत आहे.