ड्रग्ज प्रकरणी झाराप येथून एकाला तेलंगणा पोलिसांनी घेतले ताब्यात

तेलंगणा राज्यातील रजकंडा पोलीस ठाण्यात जानेवारी 2024 मध्ये ड्रग्ज प्रकरणी गुन्हा दाखल असलेला व फरार असलेला अर्जुन गोविंद पार्सेकर (58 मूळ रा सांताक्रूज गोवा) याला कुडाळ तालुक्यातील झाराप साळगांव येथून तेलंगणा पोलीसांनी बुधवारी जेरबंद केले. संशयित आपल्या झाराप साळगांव येथील सासरवाडीला आला होता. त्याचे मोबाईल लोकेशन झाराप मिळाल्याने तेलंगणा पोलीसांनी येथे येत ताल्यात घेऊन रात्री तेलंगणा कडे रवाना झाले.
जानेवारी 2024 मध्ये अर्जुन पार्सेकर यांच्यावर ड्रग्ज प्रकरणी तेलंगणात रजकंडा पोलीस ठाण्यात गुन्हा दाखल झाला होता त्यावेळ पासून तो फरार होता. तेलंगणा पोलीस त्याचा शोध घेत होते. मात्र तो सापडत नव्हता. गेल्या दोन तीन दिवसापासून त्यांचे मोबाईल लोकेशन कुडाळ तालुक्यातील झाराप साळगांव टॉवरला मिळू लागले. त्यामुळे तेलंगणा पोलीसांनी बुधवारी सायंकाळी कुडाळ गाठले. कुडाळ पोलीसांच्या मदतीने त्याला झाराप साळगांव येथे जाऊन ताब्यात घेतले. त्यांच्या नातलगांना अटकेची माहिती दिली. कुडाळ पोलीस ठाण्यात नोंद करून मग अधिक तपासासाठी तेलंगणा घेऊन रवाना झाले.