सांगेली गावच्यासुमारे साडे तीनशे वर्षांची गौरवशाली ऐतिहासिक परंपरा लाभलेल्या प्रसिद्ध अशा वैशिष्टपूर्ण गिरोबा उत्सवाला प्रारंभ

सावंतवाडी – सांगेली गावच्यासुमारे साडे तीनशे वर्षांची गौरवशाली ऐतिहासिक परंपरा लाभलेल्या प्रसिद्ध अशा वैशिष्टपूर्ण गिरोबा उत्सवाला रविवारी सायंकाळी प्रारंभ झाला. होळी पौर्णिमेच्या पूर्वसंध्येला प्रारंभ झालेल्या या सोहळ्याची सांगता रवीवारी होणार आहे. या उत्सवाला रात्री उशिरापर्यंत हजारो भाविकांनी उपस्थिती दर्शविली.
यावर्षी गिरोबा उत्सवासाठी न्हानू सनाम यांचे फणसाचे झाड निवडण्यात आले होते. ग्रामदेवतेची दरवर्षी पुन: प्रतिष्ठापना करणारे सांगेली येथील गिरीजानाथ हे एकमेव देवस्थान आहे. फणसाच्या खोडापासून साकारणाऱ्या या सोहळ्याला गिरोबा उत्सव म्हणतात. महाशिवरात्रीपासून सुरुवात झाली. याठिकाणी दोन आठवडे विविध कार्यक्रम झाले.

सायंकाळी गिरीजानाथ मंदिरात देवस्थानचे मानकरी आणि ग्रामस्थ आल्यानंतर मंदिराच्या एका बाजूचे छप्पर मोकळे करण्यात आले. यावेळी पारंपरिक धार्मिक कार्यक्रम झाले. त्यानंतर गिरिजानाथ मंदिराकडून सवाद्य निशाणकाठीसह देवस्थानचे मानकरी आणि ग्रामस्थ मिरवणुकीने गिरोबा उत्सवस्थळी आले.

उत्सवस्थळी सुहासिनीनी देवस्थानच्या मानकऱ्यांचे औक्षण केल्यानंतर गिरोबाच्या मूर्तीच्या फणसाच्या झाडाची पूजा अर्चा करून गाऱ्हाणे घालण्यात आले. त्यानंतर देवस्थानच्या मानकऱ्यांच्याहस्ते देवाच्या झाडाला खाप लावण्यात आले. त्यानंतर देवाचे हे झाड तोडताना परीसरात भाविकांची गर्दी कायम होती. हर हर महादेव च्या जयघोषात व ढोल-ताशांच्या गजरात देवाचे झाड तोडल्यानंतर भाविक नतमस्तक झालेत. त्यानंतर सायंकाळी मध्यरात्रीपर्यंत फणसाच्या खोडापासून गिरोबाची मूर्ती घडविण्यात सांगेली परिसरातील सुतार कारागीरांनी सहभाग घेतला. मध्यरात्रीनंतर चारच्या सुमारास गिरोबाची मूर्ती साकारल्यानंतर रविवारी पहाटेच्या सुमारास सवाद्य मिरवणुकीने गिरोबाची ही मुर्ती प्रतिष्ठापनेसाठी मंदिरात नेतात. यावेळी देवाला खांद लावण्याचा नवस असल्याने गिरोबाच्या या मूर्तीला खांद लावण्यासाठी भाविकांमध्ये चढाओढ असते. पुढे होळी आणि त्यापाठोपाठ गिरिजानाथाची मूर्ती असते. सोबत नेत्रदीपक फटाक्यांची आतषबाजीही असते.
रविवारी पहाटे पाचच्या सुमारास मूर्ती प्रतिष्ठापना करण्यात करण्यात आहे. तत्पूर्वी जुना देव नेमातून काढून नवीन देवाची प्रतिष्ठापना करण्यात येणार आहे.

उत्सव ते गिरिजनाथ मंदिर विविध प्रकारच्या दुकानांसह भाविकांच्या गर्दीने फुलून गेला होता. या उत्सवानिमित्त रस्त्याच्या दुतर्फ विद्युत रोषणाई करण्यात आल्याने उत्सवाचा हा मार्ग झळाळून निघाला होता.

या उत्सवामुळे गावात उत्साहाचे वातावरण होते.
उत्सवासाठी पोलिस बंदोबस्त बंदोबस्त होता. या उत्सवाचे सनम टेंबवाडी ग्रामस्थ, देवस्थान मानकरी यांनी उत्सवाचे उत्कृष्ट नियोजन केले होते. दरम्यान माजी आमदार राजन तेली रूपेश राऊळ आदी विविध क्षेत्रातील मान्यवरांनी उपस्थिती दर्शविली होती. यावेळी भाविकांना लाडू, चहा व सरबताचे वितरण करण्यात आले.

रविवारी पहाटे गिरिजानाथाची प्रतिष्ठापना झाल्यानंतर गिरोबाच्या दर्शनासाठी भाविकांची गर्दी झाली. या दिवशी हजारो भाविक गिरोबाचे दर्शन घेतात. यावेळी श्रीफळ अर्पण करणे, नवस बोलणे नवस फेडणे आदी कार्यक्रम पार पडले.