सिंधुदुर्गातील रेल्वे स्टेशनवर एक्सप्रेस गाड्याना थांबे देण्याबाबत पालकमंत्री नितेश राणे यांची केंद्रीय रेल्वे मंत्र्यांशी चर्चा
वैभववाडी कोल्हापूर नवीन रेल्वे मार्गाला गती देण्याची केली मागणी
केंद्रीय रेल्वेमंत्री अश्विनी वैष्णव यांचा सकारात्मक प्रतिसाद
सिंधुदुर्ग जिल्ह्याचे पालकमंत्री, राज्याचे मत्स्य उद्योग व बंदर विकास मंत्री नितेश राणे यांनी दिल्ली येथे केंद्रीय रेल्वेमंत्री अश्विनी वैष्णव यांची भेट घेऊन सिंधुदुर्ग व कोकणातील महत्त्वाच्या रेल्वे प्रश्नांवर चर्चा केली. कोकणातील रेल्वे स्थानकांचे आधुनिकीकरण, सिंधुदुर्ग व परिसरातील स्थानकांवर १६ एक्सप्रेस गाड्यांचे थांबे, कोयंबतूर, नागरकोइल व मडगाव एक्सप्रेसचा कणकवली येथे थांबा, मांडवी एक्सप्रेसचा नांदगाव येथे थांबा, मडुरे व सावंतवाडी येथून विशेष गाड्या, पीआरएस काउंटर, प्रवासी सुविधा उन्नतीकरण तसेच वैभववाडी–कोल्हापूर नव्या रेल्वे मार्गाच्या कामाला गती देण्याची मागणी भेटीदरम्यान केली. वैष्णव यांनी सदर मागण्या व प्रस्तावाला सकारात्मक प्रतिसाद देऊन सहकार्याची ग्वाही दिली.
