सिंधुदुर्ग जिल्हा व्यापारी महासंघाचे उपाध्यक्ष महेश नार्वेकर यांचे निधन

सिंधुदुर्ग जिल्हा व्यापारी महासंघाचे उपाध्यक्ष व कणकवली बाजारपेठ येथील प्रतिष्ठित व्यापारी महेश चंद्रकांत नार्वेकर (वय 45) यांचे आज शुक्रवारी सकाळी हृदयविकाराच्या तीव्र झटक्याने निधन झाले. काल रात्री त्यांना अस्वस्थ वाटू लागल्याने कणकवलीतील खाजगी रुग्णालयात दाखल करण्यात आले होते. मात्र त्यानंतर ते घरी गेले. आज सकाळी त्यांना हृदयविकाराचा तीव्र झटका आल्याने त्यांना पुन्हा रुग्णालयात दाखल केले. मात्र तत्पूर्वी त्यांचे निधन झाले. त्यांच्या पश्चात पत्नी एक मुलगी भाऊ असा परिवार आहे. कणकवली चे माजी नगरसेवक रुपेश नार्वेकर यांचे ते भाऊ होत. महेश नार्वेकर हे कणकवलीतील मनमिळाऊ व्यक्तिमत्व म्हणून प्रसिद्ध होते. कणकवली शहराच्या सामाजिक चळवळीत त्यांचा नेहमी सक्रिय सहभाग असे. सदा हसतमुख व मोठा मित्रपरिवार असलेले व्यापारी अशी त्यांची ओळख होती. त्यांच्या निधनाने सर्व स्तरातून दुःख व्यक्त केले जात आहे. त्यांच्या निधनाचे वृत्त समजतात कणकवलीतील विविध स्तरातील नागरिकांनी रुग्णालयात धाव घेतली.

दिगंबर वालावलकर कणकवली