मत्स्यव्यवसाय विभागाच्या २४ योजनांसाठी ऑनलाइन अर्ज सुविधा सुरू

मुख्यमंत्री देवेंद्र फडणवीस यांच्या हस्ते महाडीबीटी २.० प्रणालीवर शुभारंभ

मच्छीमार, मत्स्यशेतकरी आणि मत्स्यव्यावसायिकांना दिलासा

राज्यातील मच्छीमार, मत्स्यशेतकरी, मत्स्यव्यावसायिक आणि मच्छीमार संस्थांना शासनाच्या विविध योजनांचा लाभ घेणे अधिक सुलभ व्हावे, यासाठी मुख्यमंत्री मत्स्यसंपदा योजनेअंतर्गत मत्स्यव्यवसाय विभागाच्या २४ लाभार्थीभिमुख योजनांसाठी ऑनलाइन अर्ज सुविधा सुरू करण्यात आली आहे. मुख्यमंत्री देवेंद्र फडणवीस यांच्या हस्ते बुधवारी (२८ ऑक्टोबर) मुंबईतील सह्याद्री अतिथीगृह येथे महाडीबीटी २.० प्रणालीवर ऑनलाइन अर्ज स्वीकारण्याच्या सुविधेचा शुभारंभ करण्यात आला. राज्याचे मत्स्यव्यवसाय व बंदरे विकास मंत्री नितेश राणे यांच्या विभागामार्फत हा उपक्रम राबविण्यात येत आहे.

राज्य शासनाकडून मुख्यमंत्री मत्स्यसंपदा योजना प्रभावीपणे राबविण्यात येत असून, या योजनांच्या अंमलबजावणीतील प्रक्रिया अधिक सोपी, पारदर्शक आणि गतिमान करण्यावर भर दिला जात आहे. त्यासाठी गव्हर्नमेंट प्रोसेस री-इंजिनिअरिंग (GPR) अंतर्गत प्रशासकीय प्रक्रियांचे सुलभीकरण करण्यात येत आहे. याचाच एक भाग म्हणून मत्स्यव्यवसाय विभागाच्या २४ योजनांसाठी महाडीबीटी २.० या ऑनलाइन प्रणालीद्वारे अर्ज करण्याची सुविधा उपलब्ध करून देण्यात आली आहे.

या सुविधेमुळे राज्यातील मच्छीमार, मत्स्यशेतकरी, मत्स्यव्यावसायिक तसेच मच्छीमार संस्थांना घरबसल्या ऑनलाइन अर्ज करता येणार आहेत. योजनांचा लाभ घेण्यासाठी आवश्यक असलेली कागदपत्रे प्रत्यक्ष कार्यालयात सादर करण्याची गरज कमी होणार असून, उपलब्ध शासकीय डेटाबेसमधून आवश्यक माहिती प्राप्त करण्याची सुविधा उपलब्ध होणार आहे. तसेच विविध प्रमाणपत्रे ऑनलाइन स्वरूपात मिळण्यास मदत होणार आहे. त्यामुळे अर्ज प्रक्रिया अधिक सुलभ होऊन लाभार्थ्यांचा वेळ आणि श्रम वाचण्यास मदत होईल.

या प्रणालीच्या माध्यमातून योजनांसाठी मंजूर होणारे अनुदान थेट लाभार्थ्यांच्या आधार-संलग्न बँक खात्यात जमा होणार आहे. ऑनलाइन अर्ज प्रक्रिया, कागदपत्रांची कमी होणारी गरज आणि थेट लाभ हस्तांतरण यामुळे योजनांच्या अंमलबजावणीत पारदर्शकता वाढण्यास मदत होणार आहे. मत्स्यव्यवसायाशी संबंधित विविध घटकांना शासकीय योजनांचा लाभ मिळविण्यासाठी अधिक सुलभ व्यवस्था उपलब्ध होणार असल्याने या उपक्रमाला महत्त्व प्राप्त झाले आहे.

मत्स्यव्यवसाय क्षेत्रातील लाभार्थ्यांना शासकीय योजनांचा लाभ अधिक सहजतेने मिळावा, तसेच प्रशासकीय प्रक्रियेत सुलभता आणि गतिमानता यावी, या उद्देशाने ही ऑनलाइन सुविधा सुरू करण्यात आली आहे. इच्छुक लाभार्थ्यांनी ऑनलाइन अर्ज करण्यासाठी महाडीबीटी २.० च्या https://mahadbt2.maharashtra.gov.in या अधिकृत संकेतस्थळाला भेट द्यावी.