🛑भाजपचे जोडे मारा आंदोलन निषेधार्ह

🛑गणेशप्रसाद गवस यांनी व्यक्त केली नाराजी

कोकण नाऊ l News Channel
✅प्रतिनिधी l दोडामार्ग
भाजप पदाधिकाऱ्यांनी माजी पर्यावरण मंत्री रामदास कदम यांच्या विरोधात जोडे मारा आंदोलन केले. तो प्रकार निषेधार्ह आहे,असे मत शिवसेनेचे (शिंदे गट ) तालुकाध्यक्ष गणेशप्रसाद गवस यांनी प्रसिद्धी पत्रकाद्वारे मांडले.
ते म्हणाले,राज्यातील महायुतीचे राज्यस्तरीय नेते काही बोलत असतील तर वरिष्ठ निर्णय घेत असतात. रामदास कदम यांच्या बोलण्यावर रवींद्र चव्हाण यांनी सार्वजनिक बांधकाम मंत्री म्हणून उत्तर दिले आहे. ते याबाबत सक्षम आहेत. शासनाकडून करण्यात येणारे अनेक चांगल्या निर्णय व यशाचे श्रेय आपण घेतोय तर एखादी न घडलेल्या किंवा अपूर्ण राहिलेल्या कामाची जबाबदारी सुध्दा घेतली पाहिजे. ती सरकार म्हणून सामुदायिक आहे. मुंबई गोवा महामार्गचे सिंधुदुर्ग जिल्ह्यातील काम दोन वर्षापूर्वीच झाले आहे. रत्नागिरी व रायगड जिल्ह्यात ते अपूर्ण आहे ही वस्तुस्थिती आहे.
त्यांनी म्हटले आहे,सावंतवाडी विधानसभा मतदारसंघात काही ठराविक लोक महायुतीत हेतुपुरस्सर खडा टाकण्याचे काम करत आहेत. हे षडयंत्र आहे. आपणास अधिकृत उमेदवारी मिळाली नाही तर महायुतीचा पराभव झाला पाहिजे म्हणून काही लोक काम करत आहे व आपला विरोधक महाविकास आघाडी हे विसरून मित्र पक्ष शिवसेनेला बदनाम करून विरोधकांना अप्रत्यक्ष मदत करत आहेत.

याची भाजपला जाणीव करुन द्यावी लागेल

राज्यात भाजप सत्तेवर आला तो मुख्यमंत्री एकनाथ शिंदे व त्यांच्या शिवसेना पक्षामुळेच याची आम्हाला भाजपला जाणीव करून द्यावी लागेल.लोकसभा निवडणुकीत महाराष्ट्र राज्यातील अपयश पाहता महायुतीत भक्कम एकजूट आवश्यक आहे. तरच विधानसभेवर सत्ता स्थापन करू शकतो. सरकार स्थापन करण्यात मदत करणाऱ्या सर्व शिवसेना आमदारांना परत निवडून आणण्याचे पंतप्रधान नरेंद्र मोदी यांनी अभिवचन दिले आहे याचे पण भान भाजपमधील त्या पुढाऱ्यांनी ठेवावे,न पेक्षा जिल्ह्यात भाजप स्वतंत्र लढणार हे जाहीर करून उमेदवार घोषित करावा. आम्ही तिन्ही जागांवर स्वतंत्र उमेदवार देवून लढण्यास तयार आहोत. रोज उठसूट शालेय शिक्षणमंत्री दीपक केसरकर यांच्यावर आरोप करणे थांबवावे असेही गणेशप्रसाद गवस यांनी म्हटले आहे.