मालवणमध्ये उद्यापासून रंगणार गाबीत महोत्सव

मालवण ; अखिल भारतीय गाबीत समाज महासंघ, महाराष्ट्र राज्य गाबीत समाज व सिंधुदुर्ग जिल्हा गाबीत समाज यांच्या वतीने मालवणच्या दांडी समुद्र किनाऱ्यावर उद्या, २७ एप्रिलपासून चारदिवसीय गाबीत महोत्सव होत आहे. या महोत्सवात महाराष्ट्र, गोवा, कर्नाटक या तीन राज्यातून गाबीत बांधव सहभागी होणार आहेत. हा महोत्सव केवळ मनोरंजनात्मक न राहता त्यातून गाबीत बांधवाना एकत्र आणतानाच व्यवसाय उद्योग व नोकरीच्या संधीबाबत मार्गदर्शन करून प्रोत्साहन दिले जाणार आहे. त्यामुळे हा महोत्सव गाबीत समाजाला दिशादर्शक ठरेल, असा विश्वास अखिल भारतीय गाबीत समाज महासंघाचे अध्यक्ष परशुराम उपरकर यांनी आयोजित पत्रकार परिषदेत बोलताना व्यक्त केला.
महोत्सवाच्या पहिल्या दिवशी सकाळी १० वा. मामा वरेरकर नाट्यगृह येथे रांगोळी स्पर्धा होणार आहे. तर सायंकाळी ५ वा. फोवकांडा पिंपळ येथून मोटारसायकल रॅली, ५.३० वाजता मोरयाचा धोंडा येथून श्री देव दांडेश्वरपर्यंत भव्य शोभायात्रा निघणार आहे. या शोभायात्रेत छत्रपती शिवाजी महाजांच्या भूमिकेतील कलाकार आणि मावळे असा ऐतिहासिक सोहळा साकारला जाईल. याचवेळी समुद्रातून सजावट केलेल्या आणि मशाली व झेंडे लावलेल्या नौकांची मिरवणूकही निघणार आहे. सायंकाळी ६ वा. दांडी येथे महोत्सवाच्या ठिकाणी या नौकांचे स्वागत झाल्यावर गाबीत महाज्योतीचे प्रज्वलन व गाबीत महोत्सवाचे उदघाटन होणार आहे. ६.३० वा. गाबीत भूषण पुरस्कार प्रदान सोहळा व गाबीत सन्मान सत्कार कार्यक्रम, क्रिकेट स्पर्धा व होडी सजावट स्पर्धा बक्षीस वितरण होणार आहे. रात्री ८ वा. इतिहास संशोधक अमर आडके यांचे गाबीत समाज व शिवकाल संबधी भाषण, रात्री ९ वा. गाबीत समाजाचा शिमगोत्सव सदर होणार आहे.
२८ रोजी सकाळी ८.३० वा. दांडी किनारी रापण प्रात्यक्षिक दाखविणे, शेंडी पागून मासे पकडणे स्पर्धा, गरवून मासे पकडणे प्रात्यक्षिक, सकाळी १० वा. मामा वरेरकर नाट्यगृह येथे मत्स्य संपदा व सिंधुरत्न योजना, किमान कौशल्य विकास व रोजगार योजना, मत्स्य उद्योग, बँक कर्ज प्रकरणे याबाबत माहिती व मार्गदर्शन कार्यक्रम होईल. तर दांडी येथे सायंकाळी ६ ते रात्री १० या वेळेत गाबीत समाजाचे जिल्हास्तरीय कार्यक्रम, सागरी सुंदरी स्पर्धा, गाबीत भूषण पुरस्कार व सन्मान प्रदान कार्यक्रम होणार आहे.
दि. २९ रोजी सकाळी १० वा. मामा वारेरकर नाट्यगृह येथे पर्यटन, जलक्रीडा, जात पडताळणी, बँक योजना याविषयी मार्गदर्शन तर १२ वा. “मच्छीमार समाज व मानव साधन विकास” या विषयावर प्रा. नंदकिशोर परब यांचे व्याख्यान होणार आहे. तर सायं. ६ ते रात्री ९ या वेळेत दांडी येथे स्थानिक कलाकारांचे गुणदर्शनपर कार्यक्रम, शेंडी पागणे मासेमारी स्पर्धा, चित्रकला स्पर्धा, निबंध स्पर्धा, रांगोळी स्पर्धा बक्षीस वितरण, गाबीत भूषण पुरस्कार वितरण व सन्मान, रात्री ९ वा. मुबईतील सुप्रसिद्ध कलाकारांचा नृत्याविष्कार कार्यक्रम होणार आहे.

प्रतिनिधी, मालवण