आमदार किरण सामंत यांच्या वाढदिवसानिमित्त यश कम्प्युटर खारेपाटण च्या वतीने दहावीच्या विद्यार्थ्यांसाठी भव्य मार्गदर्शन शिबिर संपन्न
राजापूर – लांजा मतदारसंघाचे लोकप्रिय आमदार किरण भैया सामंत यांच्या वाढदिवसाचे औचित्य साधून आज, सोमवार दिनांक ५ जानेवारी २०२६ रोजी, खारेपाटण विभागात इयत्ता दहावीच्या विद्यार्थ्यांसाठी ‘विशेष शैक्षणिक मार्गदर्शन शिबिराचे’ यशस्वी आयोजन करण्यात आले. यश कॉम्प्युटर अकॅडमीचे संचालक तथा शिवसेना कणकवली तालुकाप्रमुख श्री. मंगेश गुरव यांच्या पुढाकाराने आयोजित या शिबिराला विद्यार्थ्यांचा उत्स्फूर्त प्रतिसाद लाभला.
दिमाखदार शुभारंभ
कार्यक्रमाचा शुभारंभ संस्थेचे अध्यक्ष सन्माननीय प्रवीणजी लोकरे आणि रोटरी क्लब ऑफ खारेपाटणचे अध्यक्ष श्री. कोकाटे सर यांच्या प्रमुख उपस्थितीत झाला. यावेळी व्यासपीठावर मुख्याध्यापक श्री. सानप सर, पर्यवेक्षक राऊत सर, लोकमतचे पत्रकार संतोषजी पाटणकर, कृषी उत्पन्न बाजार समितीचे संचालक श्री. मंगेश ब्रम्हदंडे, श्री. सोगम सर, श्री. कापसे सर, कोकाटे मॅडम, भोर मॅडम आदी मान्यवर उपस्थित होते.
तज्ज्ञ मार्गदर्शकांकडून मोलाचे मार्गदर्शन
दहावीच्या परीक्षेला सामोरे जाणाऱ्या विद्यार्थ्यांचा आत्मविश्वास वाढवण्यासाठी गणित, इंग्रजी आणि विज्ञान या विषयांचे मराठी व सेमी इंग्लिश माध्यमातील तज्ज्ञ शिक्षक निमंत्रित करण्यात आले होते:
गणित: सौ. विधी मुद्राळे मॅडम (कासारदे विद्यालय) आणि श्री. हनुमंत वाळके सर (वारगाव हायस्कूल).
इंग्रजी: श्री. विनायक टाकले सर (महाडिक हायस्कूल, तरळे).
विज्ञान: श्री. संजय शेवाळे सर (इन्सुली, सावंतवाडी) आणि सौ. सोनाली बांदलकर मॅडम (कळुसकर इंग्लिश स्कूल, सावंतवाडी).
१५० हून अधिक विद्यार्थ्यांची उपस्थिती
या शिबिरासाठी खारेपाटण शेठ न. म. विद्यालय, वारगाव श्री. म. वी. केसरकर विद्यालय, शेरपे माध्यमिक विद्यालय, कोरले घालवली माध्यमिक विद्यालय अशा विविध शाळांतील सुमारे १५० विद्यार्थ्यांनी उपस्थित राहून मार्गदर्शनाचा लाभ घेतला.
यशवंतांचा गौरव
याच कार्यक्रमात देशपातळीवर ‘समूह वाद्य वादन’ स्पर्धेत प्रथम क्रमांक मिळवून खारेपाटणचे नाव उज्ज्वल केल्याबद्दल खारेपाटण शेठ न. म. विद्यालयाच्या संगीत विभागाचे श्री. पेंढुरकर सर व त्यांच्या विद्यार्थ्यांचा, शिवसेना कणकवली तालुक्याच्या वतीने श्री. मंगेश गुरव यांनी शाल व श्रीफळ देऊन विशेष सत्कार केला.
कार्यक्रमाचे प्रास्ताविक श्री. मंगेश गुरव यांनी केले. अध्यक्षीय भाषणात प्रवीणजी लोकरे यांनी विद्यार्थ्यांच्या उज्वल भविष्यासाठी अशा शिबिरांची गरज व्यक्त केली. मुख्याध्यापक सानप सर आणि श्री. कोकाटे सर यांनीही मार्गदर्शन केले. कार्यक्रमाचे आभार प्रदर्शन सौ. कोकाटे मॅडम यांनी केले.
