बारामती येथील राष्ट्रीय स्तरावरील स्पर्धेत व्हिक्टर डांटस लॉ कॉलेज कुडाळचे घवघवीत यश

वक्तृत्व स्पर्धेत पृथ्वीराज एकले आणि एलविना फर्नांडिस प्रथम

बारामती येथील विद्या प्रतिष्ठानचे वसंतराव पवार लॉ कॉलेज बारामतीच्या रौप्य महोत्सवी वर्षाचे औचित्य साधून आयोजित केलेल्या लेक्स कनेक्ट या लॉ फेस्ट अंतर्गत राष्ट्रीय स्तरावरील विविध स्पर्धांचे आयोजन करण्यात आले होते. या स्पधांमध्ये कुडाळच्या व्हिक्टर डांटस लॉ कॉलेजच्या विद्यार्थ्यांनी घवघवीत यास संपादन केले.
या स्पर्धे अंतर्गत पोस्टर मेकिंग स्पर्धा, पथनाट्य स्पर्धा, वादविवाद स्पर्धा, वक्तृत्व स्पर्धा मुट कोर्ट स्पर्धा इत्यादी अनेक स्पर्धांचे आयोजन करण्यात आले होते.
या स्पर्धांमध्ये व्हिक्टर डांटस लॉ कॉलेज कुडाळचे विद्यार्थी सहभागी झाले होते. यातील वक्तृत्व स्पर्धेसाठी चारित्र्य विकासामध्ये खेळांची भूमिका, नागरिकशास्त्र हा विषय शाळा, महाविद्यालय आणि विद्यापीठे या या तीनही पातळीवर अत्यावश्यक आहे का?, कायदा क्षेत्रातील एआय चा वाढता वापर आणि भविष्यातील आव्हाने, मानसिक आरोग्य जागृती -काळाची गरज असे विषय देण्यात आलेले होते.
या स्पर्धेसाठी व्हिक्टर डांटस लॉ कॉलेज कुडाळचे विद्यार्थी पृथ्वीराज एकले आणि एलविना फर्नांडिस यांनी वक्तृत्व स्पर्धेमध्ये सहभाग नोंदवला होता.
पृथ्वीराज एकले याने नागरिकशास्त्र हा विषय शाळा, महाविद्यालय आणि विद्यापीठे या तीनही पातळीवर अत्यावश्यक आहे का? या विषयासंदर्भात मराठी मध्ये तर एलविना फर्नांडिस हिने कायदा क्षेत्रातील एआय चा वाढता वापर आणि भविष्यातील आव्हाने या विषयावर इंग्लिश मधून आपली मते प्रभावीपणे सादर करून दोघांनीही मराठी आणि इंग्लिश वक्तृत्व स्पर्धेमधे प्रथम क्रमांक मिळवला. या दोघांनाही बारामती लॉ कॉलेज कडून सन्मानचिन्ह व प्रशस्तीपत्रक देऊन गौरवण्यात आले.
ग्रामीण भागातील विद्यार्थ्यांनी या अत्यंत प्रतिष्ठेच्या अशा राष्ट्रीय स्तरावरील स्पर्धेमध्ये सहभाग नोंदवून उत्तुंग यश मिळवल्याबद्दल लॉ कॉलेज कुडाळ आणि सहभागी स्पर्धक, मार्गदर्शक यांच्यावर सर्व स्तरातून अभिनंदनाचा वर्षाव करण्यात येत आहे.