कासार्डेतील अवैध सिलिका उत्खनन प्रकरणाची चौकशी करण्याचे जिल्हाधिकाऱ्यांचे आश्वासन

शिवसेना (उद्धव बाळासाहेब ठाकरे) शिष्टमंडळाची जिल्हाधिकाऱ्यांकडे कारवाईची मागणी

सिंधुदुर्ग जिल्ह्यातील कासार्डे गावात मोठ्या प्रमाणात सुरु असलेल्या अवैध सिलिका वाळू उत्खननाबाबत चौकशी करून कडक कारवाई केली जाईल, असे आश्वासन जिल्हाधिकारी अनिल पाटील यांनी दिले आहे. शिवसेना (उद्धव बाळासाहेब ठाकरे) पक्षाच्या शिष्टमंडळाने सोमवारी जिल्हाधिकाऱ्यांची भेट घेऊन या प्रकरणात तात्काळ कारवाई करण्याची मागणी केली.

या शिष्टमंडळात माजी आमदार परशुराम उपरकर, माजी आमदार वैभव नाईक, माजी आमदार राजन तेली, जिल्हाप्रमुख संदेश पारकर आणि कणकवली विधानसभा प्रमुख सतीश सावंत सहभागी होते. त्यांनी सादर केलेल्या माहितीनुसार, केवळ ३५० हेक्टर लीज परवानगी असतानाही सुमारे १००० ते १५०० हेक्टर क्षेत्रावर अवैधरित्या उत्खनन सुरु असून, यामुळे शासनाचा कोट्यवधी रुपयांचा महसूल बुडवला गेला आहे.

सिलिका ट्रेडिंग आणि वॉशिंग प्लांटच्या नावाखाली अनेक सामान्य शेतकऱ्यांची फसवणूक होत असल्याचाही आरोप शिष्टमंडळाने केला. २०२२ मध्ये झालेल्या काही अवैध उत्खनन प्रकरणांमध्ये कोट्यवधी रुपयांचा दंड आकारण्यात आला असूनही त्या जमिनींचा लिलाव न करता उलट त्यावर लीज दिल्याचेही या शिष्टमंडळाने निदर्शनास आणून दिले.

या तक्रारीची गंभीर दखल घेत जिल्हाधिकारी अनिल पाटील यांनी एन.एम.सी. कंपनीला दिलेल्या लीजची चौकशी करून नियमभंग आढळल्यास योग्य ती कारवाई केली जाईल, असे स्पष्ट केले. तसेच ज्या जमिनींवर दंड आकारले आहेत, त्यावर पुढे लीज देण्यात येणार नाही, असेही त्यांनी सांगितले.