भिरवंडे रामेश्वर मंदिराच्या पुनर्बांधणीचा शुभारंभ.

पायाभरणी आणि कोनशिला समारंभ थाटात संपन्न.

भव्य शोभायात्रेमध्ये भाविक मंत्रमुग्ध

कणकवली/मयूर ठाकूर.

कणकवली तालुक्यातील भिरवंडे गावातील श्री.देव रामेश्वर मंदिराचा जिर्णोद्धार होणार असून भव्य दिव्य असे रामेश्वराचे मंदिर बांधकाम होणार आहे.मंदिर पुनर्बांधणीचा पायाभरणी आणि कोनशिला समारंभ नुकताच संपन्न झाला.सकाळी भव्यदिव्य अशा शोभायात्रेचे व कलश यात्रेचे आयोजन करण्यात आले होते.या शोभा यात्रेने भाविकांचे लक्ष वेधले.भक्तिमय वातावरण गावात निर्माण झाले होते आणि हजारो भाविकांची उपस्थिती लक्षनीय होती.
भिरवंडे गावचे ग्रामदैवत श्री देव रामेश्वर मंदिर बांधकाम हाती घेण्यात आले असून कोकणातील २१ व्या शतकातील भव्य असे रामेश्वराचे मंदिर पर्यटनाच्या दृष्टिकोनातून उभे राहत आहे.
लिंगेश्वर मंदिरामध्ये अभिषेक करून त्यानंतर श्री.गणेश मंदिरापासून शोभायात्रा व कलश यात्रेला सुरुवात झाली.लेझीम पथक, ढोल पथक, वारकरी दिंडी हरिनामाचा जागर करत ओम नमः शिवाय,श्री.देव रामेश्वराचा जयघोष करत पारंपरिक वेशभूषा करून सौभाग्यवती महिला कलश घेऊन या शोभायात्रेतून व कलश यात्रे तुन रामेश्वर मंदिरापर्यंत पायी चालत अभिषेक कार्यक्रमांमध्ये सहभागी झाले.सकाळी आठ ते दहा वाजेपर्यंत शोभायात्रा त्यानंतर रामेश्वराच्या पिंडीवरील जलाभिषेकासाठी प्रयागराज येथील त्रिवेणी संगमावरील गंगा -यमुना -सरस्वतीचे पवित्र जल, नर्मदा परिक्रमेचे पवित्र जल आणि गोदावरी त्र्यंबकेश्वर येथील पवित्र जलाने श्री देव रामेश्वराच्या पिंडीवर जलाभिषेक करून मंदिर पायाभरणी आणि कोनशिला स्थापित करून मंदिराचा पाया रचला गेला.