मेडिकल कॉलेजला दंड,शिवसेना ठाकरे गटाचे आंदोलन!

जोरदार घोषणाबाजी करत शासनाचा केला निषेध

शैक्षणिक सुविधांचा अभाव आणि अपुऱ्या शिक्षक संख्येमुळे आपल्या सिंधुदुर्ग शासकीय वैद्यकीय महाविद्यालयाला राष्ट्रीय आयुर्विज्ञान आयोगाने (NMC) १२ लाखाचा दंड केला आहे. सिंधुदुर्ग शासकीय वैद्यकीय महाविद्यालयाला सोयी सुविधा पुरविण्यात शिंदे फडणवीस सरकार अपयशी ठरल्यामुळे आणि जिल्हा शल्य चिकित्सक आणि आपल्या नाकर्तेपणामुळे हा दंड भरावा लागला आहे. लाखोंचा दंड बसूनही शासकीय वैद्यकीय महाविद्यालय, सिंधुदुर्ग येथील त्रुटी अद्याप पर्यंत दूर करण्यात आलेल्या नाहीत, महाविकास आघाडी सरकारच्या काळात तत्कालीन मुख्यमंत्री उद्धव ठाकरे यांनी सिधुदुर्ग शासकीय वैद्यकीय महाविद्यालय मंजुरीचा ८ डिसेंबर २०२० साली शासन निर्णय काढून एकूण ९६६ कोटी रु. खर्चास मान्यता दिली होती. गेल्या चार वर्षात शिंदे फडणवीस सरकारला या महाविद्यालयाची इमारत बांधता आली नाही. विद्यार्थ्यांसाठी आवश्यक त्या वर्गखोल्या नाहीत, बसती गृहाची व्यवस्था केलेली नाही. शिक्षक भरती केलेली नाही. असा आरोप करत शिवसेना ठाकरे गटाच्या वतीने आज जिल्हा वैद्यकीय महाविद्यालयाच्या बाहेर आंदोलन केले. यावेळी जिल्हा शल्य चिकित्सक व डीन याना ठाकरे गटाच्या वतीने निवेदन देण्यात आले. यात म्हटले आहे,
नियमित पदे ५६४ मंजूर आहेत त्यातील ३४ पदे भरलेली आहेत आणि एकूण ५३० पदे रिक्त आहेत.
कंत्राटी पदे ५२२ मंजूर आहेत त्यातील सर्व पदे रिक्त आहेत
प्राध्यापकांची २२ पदे मंजूर आहेत त्यातील केवळ ५ पदे भरलेली असून १७ पदे रिक्त आहेत. सहयोगी प्राध्यापकांची २६ पदे मंजूर असून केवळ ११ पदे भरलेली आहेत आणि १५ पदे रिक्त आहेत.
सहाय्यक प्राध्यापकांची ४३ पदे मंजूर असून केवळ ६ पदे भरलेली आहेत आणि ३७ पदे रिक्त आहेत.
तांत्रिक ९१ पदे मंजूर असून केवळ ३ पदे भरलेली आहेत आणि ८८ पदे रिक्त आहेत.
अतांत्रिक ९२ पदे मंजूर असून केवळ ७ पदे भरलेली आहेत आणि ८५ पदे रिक्त आहेत.
या सर्व सोयी सुविधांची पूर्तता करण्यात शिंदे- फडणवीस सरकार अपयशी ठरले आहेत. मात्र आपण देखील सरकारकडे सातत्यपूर्ण पाठपुरावा करण्यात असमर्थ ठरले आहात हि खेदाची बाब आहे. सिंधुदुर्ग शासकीय वैद्यकीय महाविद्यालय बंद पाडण्यासाठीच शिंदे- फडणवीस सरकार आपल्या माध्यामातून प्रयत्न करीत आहे. याचा आम्ही शिवसेना उद्धव बाळासाहेब ठाकरे पक्षाच्या वतीने निषेध व्यक्त करतो. जर येत्या महिन्याभरात या महाविद्यालयात सर्व सोयी सुविधांची पूर्तता, तसेच महाविद्यालयाच्या नवीन इमारत व वसतिगृहाचे काम सुरु न झाल्यास पुन्हा एकदा याबाबत आंदोलन छेडण्याचा इशारा त्यांनी दिला आहे. या आंदोलनात आमदार वैभव नाईक यांच्या नेतृत्वाखाली जिल्हा बँकेचे माजी अध्यक्ष सतीश सावंत, जिल्हाप्रमुख संजय पडते, महिला जिल्हाप्रमुख नीलम सावंत, नगरसेवक उदय मांजरेकर,
माधवी दळवी, वैदेही गुडेकर आदी उपस्थित होते.

सिंधुदुर्ग प्रतिनिधी