🛑डोक्यावर हातोड्याने घाव घालत प्रेयसीला जीवे मारण्याचा प्रयत्न

🟡माटणेतील घटना: प्रियकराला अटक; एक दिवसाची पोलिस कोठडी

कोकण नाऊ l News Channel
✅प्रतिनिधी l दोडामार्ग
शिरगाव (गोवा) येथील लईराईच्या जत्रेला बोलावूनही न आल्याच्या रागातून प्रियकराने प्रेयसीच्या डोक्यावर हातोड्याने घाव घालत जीवे मारण्याचा प्रयत्न केला. यावेळी त्याने तिच्या अंगावर पेट्रोल ,रॉकेलसदृश ज्वालाग्रही द्रव पदार्थ टाकून तिला जाळण्याचा प्रयत्नही केला; मात्र प्रसंगावधान राखत तिने पळ काढल्याने ती वाचली.तिच्यावर येथील ग्रामीण रुग्णालयात उपचार सुरू आहेत.खुनाचा प्रयत्न केल्याप्रकरणी पोलिसांनी आंबडगाव येथील मनोहर अशोक गवस (वय २४) याला अटक केली. त्याला न्यायालयासमोर हजर केले असता त्याला एक दिवसाची पोलिस कोठडी सुनावण्यात आली. हल्ल्याची घटना सोमवारी (ता.१) दुपारी सव्वाचार ते साडेचारच्या दरम्यान माटणे गवाळ येथे घडली.
याबाबत पोलिसांकडून व घटनास्थळावरुन मिळालेली माहिती अशी: संबंधित युवती काजू काढण्यासाठी आपल्या घराशेजारील काजू बागेत गेली होती. त्यावेळी तिचा प्रियकर मनोहर तिथे आला. ती आठवडाभर बोलत नव्हती, ऑनलाईन असूनही मेसेजला प्रतिसाद देत नव्हती त्याचा राग आणि संशय त्याच्या डोक्यात असावा.आल्यावर त्यानें तू मला फसवलस असे म्हणत भांडण काढले.ती म्हणाली मी फसवले कुठे, तुझ्या आईशी मी लग्नाबद्दल बोलले, फसवायच असतं तर बोललेच नसते. त्याने त्याचे समाधान झाले नाही आणि रागाच्या भरात त्याने आपल्या जवळच्या पिशवीतून हातोडा काढून तिच्या डोक्यावर एकामागोमाग एक घाव घालण्यास सुरु केले. त्याने अचानक केलेले घाव चुकवण्यासाठी तिने हात पुढे केले त्यात तिचे हातही जायबंदी झाले. त्यानंतर त्याने जवळची बाटली आणि लायटर काढला. तिच्या अंगावर बाटलीतील तो ज्वालाग्रही पदार्थ टाकला आणि पेटविण्याचा प्रयत्न केला,तेवढ्यात गोव्यातील कुडचिरे मार्गाने एक दुचाकी आली. त्याचा आवाज ऐकून तो घाबरला आणि थांबला. त्याचवेळी धीर करुन ती युवती जीवाच्या आकांताने ओरडत धावत सुटली आणि चुलत भावाचे घर गाठले. घरात वहिनी होती. सगळा प्रकार ऐकून त्यांनी शेजारच्या व्यक्तीला बोलावून घेत तिला घरी सोडण्यास सांगितले. नंतर वडील तिला येथील रुग्णालयात उपचारासाठी घेऊन आले. तिच्या डोक्यावर ठिकठिकाणी घाव आहेत.त्याला २२ हून अधिक टाके पडले आहेत. तिचे दोन्ही हात सुजले आहेत. शिरगाव गोवा येथील लईराईची जत्रा २४ एप्रिलला होती. त्या जत्रेला त्याच्यासोबत ती न आल्याने त्याने तिच्यावर १ मेस दुपारी हल्ला केला.
दरम्यान, पोलिस निरीक्षक ऋषिकेश अधिकारी यांच्या मार्गदर्शनाखाली सहायक पोलिस निरीक्षक जयेश ठाकूर पुढील तपास करत आहेत.

ज्याचा जीव वाचवला तोच जीवावर उठला

रुग्णालयात जखमी तरुणीची भेट घेतली. गेली पाच वर्षे आपले प्रेम होते. लग्न नाही केलेस तर आत्महत्या करेन असे त्याने सांगितले. त्यामुळे घरात विरोध असतानाही मी लग्नाला तयार झाले. आईवडिलांना मी तयार करणार होते. त्याने जीव देऊ नये म्हणून मी तयार झाले. दिवाळीनंतर लग्न करण्याचेही ठरले होते; पण काही अडचणीमुळे केवळ जत्रेला त्याच्यासोबत गेले नाही म्हणून त्याने चुकीचे पाऊल उचलले. ज्याचा जीव वाचवला तोच जीवावर उठला असे तिने सांगितले.
प्रतिनिधी, कोकण नाऊ, दोडामार्ग