तरंदळे धरणामध्ये मध्ये युवक युवतीची एकत्रित आत्महत्या

घटनेने तालुक्यात एकच खळबळ

पोलिसांकडून पहाटेच घटनास्थळी धाव

कणकवली तालुक्यातील कलमठ कुंभारवाडी येथील एक युवक व कणकवली शहरातील युवती यांनी एकत्रितरित्या तरंदळे येथील धरणाच्या पाण्यात उडी घेऊन आत्महत्या केली. ही घटना बुधवारी उत्तररात्री १.३० वा सुमारास उघडकीस आली. या दोघांनीही एवढे टोकाचे पाऊल का उचलले, हे अद्याप समजू शकले नाही. घडल्या प्रकारामुळे कणकवली तालुक्यात एकच खळबळ उडाली आहे. यातील मुलाचे वय २२ वर्षे असून मुलीचे वय १८ वर्षे आहे
आत्महत्या करणारा मुलगा कलमठ गावातील तर मुलगी कणकवली शहरातील आहे. सदर मुलाचा मंगळवारी दुपारच्या सुमारास मोबाईल हरवला होता. हाच मोबाईल शोधण्यासाठी तो सायंकाळी ७ वा. सुमारास चुलत्याची दुचाकी घेऊन घराबाहेर पडला होता. रात्री उशिरापर्यंत तो घरी न आल्याने कुटुंबीयांनी शोधाशोध सुरू केली. दरम्यान स्वतःचा मोबाईल नसल्याने या मुलाने आपल्या आईचा मोबाईल वापरला होता. याच मोबाईलवरून त्याने एका मुलीला व्हाट्सअप मेसेज केले असून ‘आपण तरंदळे धरणावर जाऊया’ असे सुचवले होते. हे मेसेज मुलाच्या कुटुंबीयांच्या वाचनात आल्यानंतर त्यांनी रात्रीच्या सुमारास तरंदळे धरण गाठले. तेथे बॅटरीच्या सहाय्याने शोध घेतला असता धरणाच्या पाण्यामध्ये सदर मुलगा व मुलगी असे दोघांचे मृतदेह आढळून आले. घटनेची माहिती समजतात पोलिसांनीही घटनास्थळ गाठले. पोलीस, ग्रामस्थ यांनी पहाटे ५ वाजण्याच्या सुमारास मृतदेह पाण्याबाहेर काढले. दोन्ही मृतदेह विच्छेदनासाठी सध्या कणकवली उपजिल्हा रुग्णालयात आणण्यात आले आहेत. तर मुलाच्या चुलत्याने दिलेल्या खबरीनुसार घटनेची कणकवली पोलीस ठाण्यात नोंद झाली आहे.