कुडाळ आणि देवगड न्यायालय इमारतीचा २४ ला कोनशिला समारंभ

सर्वोच्च न्यायालयाचे न्यायमूर्ती भूषण गवई यांच्या हस्ते

नारायण राणे, देवेंद्र फडणवीस, रवींद्र चव्हाण यांची उपस्थिती

मुंबई उच्च न्यायालयाचे मुख्य न्यायाधीश देवेंद्रकुमार उपाध्याय राहणार उपस्थित

दोन्ही न्यायालय इमारतींसाठी प्रत्येकी सुमारे ३५ कोटी निधी मंजूर

निलेश जोशी । कुडाळ : सिंधुदुर्ग जिल्ह्यातील कुडाळ आणि देवगड येथील दिवाणी न्यायाधीश कनिष्ठ स्तर आणि न्यायदंडाधिकरी प्रथम श्रेणी न्यायालय नवीन इमारतीचा कोनशिला समारंभ शनिवार दि. २४ फेब्रुवारी रोजी कुडाळ आणि देवगड येथे होणार आहे. या दोन्ही ठिकाणी सर्वोच्च न्यायालयाचे माननीय न्यायमूर्ती भूषण गवई यांच्या हस्ते हा कोनशिला समारंभ होणार आहे, अशी माहिती महाराष्ट्र-गोवा बार कौंसिलचे सदस्य ऍड. संग्राम देसाई यांनी दिली. ते आज सायंकाळी कुडाळ येथे पत्रकार परिषदेत बोलत होते. या दोन्ही इमारतींना प्रत्येकी ३५ कोटी रुपये निधी मिळाला असून १८ महिन्यात या दोन्ही इमारती बांधून पूर्ण होतील, असे ऍड. देसाई यांनी यावेळी सांगितले. .
यावेळी बोलताना ऍड. संग्राम देसाई म्हणाले, देवगड येथे सकाळी १० वाजता तर कुडाळ येथे सायंकाळी ४ वाजता हा समारंभ होणार आहे. या कोनशिला समारंभाला केंद्रीय मंत्री नारायण राणे, राज्याचे उपमुख्यमंत्री तथा विधी आणि न्यायमंत्री देवेंद्र फडणवीस, मुबई उच्च न्यायालयाचे मुख्य न्यायाधीश देवेंद्रकुमार उपाध्याय, जिल्ह्याचे पालकमंत्री रवींद्र चव्हाण, मुंबई उच्च न्यायालयाचे न्यायमूर्ती नितीन बोरकर, सिंधुदुर्गचे प्रमुख जिल्हा आणि सत्र न्यायाधीश हेमंत गायकवाड तसेच बार कौन्सिलचे अध्यक्ष ऍड. परिमल पांडे ऊपस्थित राहणार आहेत. त्याच बरोबर शालेय शिक्षण मंत्री दीपक केसरकर, खासदार विनायक राऊत, कुडाळचे आमदार वैभव नाईक आणि कणकवलीचे आमदार नितेश राणे हे या कार्यक्रमाला विशेष निमंत्रित असणार आहेत.
ऍड. देसाई पुढे म्हणाले कि, या दोन इमारतींच्या कोनशिला समारंभाच्या निमित्ताने सिंधुदुर्ग जिल्हयातील मालवण आणि सावंतवाडी या दोन न्यायालय इमारतीच्या कामांना सुद्धा चालना मिळेल. त्यासाठी हा कार्यक्रम फार महत्वाचा आहे. तसेच या कार्यक्रमाच्या निमित्ताने सिंधुदुर्गचे सुपुत्र असलेले आणि मुंबई उच्च न्यायालयात मुंबई येथे रजिस्ट्रार म्हणून कार्यरत असलेले न्यायमूर्ती लाडशेठ बिले आणि नागपूर येथे रजिस्ट्रार म्हणून कार्यरत असलेले न्यायमूर्ती श्री. सातवळेकर यांचा सत्कार देखील सर्वोच्च न्यायालयाचे न्यायमूर्ती भूषण गवई यांच्या हस्ते होणार आहे, असे ऍड. देसाई यांनी सांगितले.
जिल्ह्यात देवगड न्यायालय इमारतीचे बांधकाम झाल्यानंतर बऱ्याच वर्षानंतर या दोन इमारतींचे नव्याने बांधकाम होत आहे. त्यामुळे आमच्या दुर्ष्टीने हि महत्वाची बाब असल्याचे ऍड. संग्राम देसाई यांनी सांगितले. या दोन्ही इमारतीसाठी प्रत्येकी सुमारे ३५ कोटी रुपयांचा निधी मंजूर झाला आहे. कुडाळ येथील न्यायालय इमारत ११५ गुंठे क्षेत्रामध्ये होणार आहे. हि इमारत तीन माजली असेल. त्यात भव्य असा न्यायालय कक्ष असेल. तसेच दिव्यांग पक्षकारांसाठी आणि बाल साक्षीदारांसाठी विशेष व्यवस्था असेल. न्यायमूर्तींसाठी निवास व्यवस्था, कँटीन, वकिलांसाठी प्रशस्त दालन अशा सुविधा येथे असतील असे ऍड. संग्राम देसाई यांनी सांगितले.
या पत्रकार परिषदेला कुडाळ तालुका वकील संघ अध्यक्ष ऍड. राजश्री नाईक, उपाध्यक्ष ऍड. अविनाश परब, सचिव ऍड. महेश शिंपुकडे, खजिनदार ऍड. अमित सावंत, महिला उपाध्यक्ष ऍड. प्रज्ञा पाटील, जिल्हा बार उपाध्यक्ष ऍड. विवेक मांडकुलकर, जिल्हा सदस्य ऍड. अमोल सामंत, ऍड. राजीव बिले, ऍड. अवधूत भणगे, ऍड. निलांगी रांगणेकर, ऍड. तुषार भणगे, ऍड. गौरव पडते, ऍड. अमित हरमलकर, ऍड. राजीव कुडाळकर, ऍड. हितेश कुडाळकर, ऍड. रुपेश देसाई, ऍड. समीर कुलकर्णी, ऍड. आनंद गवंडे, ऍड. वैद्य, ऍड. दीपक म्हाडदळकर, ऍड. निकिता सामंत, ऍड. तेजश्री मेस्त्री, ऍड. कविता खोचरे, ऍड. संध्या देसाई, ऍड. श्रद्धा तेंडोलकर, ऍड. मळगावकर, ऍड. भाऊ परब उपस्थित होते. या कार्यक्रमाला सर्वानी उपस्थित राहावे असे आवाहन कुडाळ दिवाणी न्यायाधीश अश्वनी बाचूळकर आणि कुडाळ वकील संघाच्या अध्यक्ष ऍड. राजश्री नाईक यांनी केले आहे.

निलेश जोशी, कोकण नाऊ, कुडाळ.