Views: 67
सिंधुदुर्ग जिल्हा परिषदेतील विज्ञान विषय समूहातील पदोन्नत्या मागील काही वर्ष रखडलेल्या आहेत. विज्ञान विषय समूहातील शिक्षकांची कमतरता पाहता सिंधुदुर्ग जिल्हा परिषदेतील कार्यरत प्राथमिक शिक्षकांमधील विज्ञान समूहातील पदवीधर शिक्षकांना पवित्र पोर्टल भरतीपूर्वी विज्ञान विषय शिक्षक पदोन्नती देण्यात यावी या मागणी साठी महाराष्ट्र राज्य शिक्षक परिषद प्राथमिक विभाग शाखा सिंधुदुर्ग विज्ञान पदाविधाराकांसोबत १९ ऑक्टोबर २०२३ रोजी दुपारी ३ ते सायंकाळी ५ वाजेपर्यंत धरणे आंदोलन करण्यात येणार आहे.
इयत्ता ६ वी ते ८ वी वर्गांकरिता गणित व विज्ञान हे दोन कठीण समजले जाणारे विषय पदवीधर शिक्षकांनी शिकविणे अपेक्षित आहे. गणित व विज्ञान विषय शिकविण्यासाठी पदवीधर शिक्षक उपलब्ध नसल्याने इतिहास, भूगोल किंवा मराठी इत्यादी विषय घेऊन पदवीधर झालेल्या शिक्षकांना सध्या गणित व विज्ञान हे विषय शिकवावे लागत आहेत. त्यामुळे विद्यार्थ्यांच्या गणित व विज्ञान या दोनही विषयांच्या गुणवत्तेवर परिणाम होत आहे.
जिल्हा परिषद सिंधुदुर्ग प्राथमिक शिक्षण विभागांतर्गत चालू असणाऱ्या ६ वी ते ८ वी वरिष्ठ प्राथमिक शाळेत गणित- विज्ञान विषय शिक्षकांच्या एकूण मंजूर ३०९ पदापैकी २२४ पदे अद्यापही रिक्त असल्यामुळे विद्यार्थ्यांचे शैक्षणिक नुकसान होत असून गणित - विज्ञान अध्यापनाच्या दर्जावर विपरीत परिणाम होत आहे.
शिक्षकांअभावी गुणवत्ता खालावत असून पटसंख्या ही धोक्यात येऊ लागली आहे. RTE Act 2009 नुसार प्रत्येक वरिष्ठ प्राथमिक शाळेत एक विज्ञान विषय शिक्षक उपलब्ध असणे बंधनकारक आहे. शालेय शिक्षण विभाग महाराष्ट्र शासन निर्णय १६ डिसेंबर २०१३ नुसार वरिष्ठ प्राथमिक शाळेत पहिले पद हे गणित-विज्ञान शिक्षका करता अनिवार्य आहे.
यशवंतराव चव्हाण महाराष्ट्र मुक्त विद्यापीठाने प्राथमिक शिक्षकांसाठी V92 या अभ्यासक्रमांतर्गत विज्ञान पदवी धारण करण्याची संधी दिलेली आहे. सिंधुदुर्ग जिल्हा परिषदेच्या काही प्राथमिक शिक्षकांनी यातून विज्ञान पदवी प्राप्त केलेली आहे. तसेच काही शिक्षकांनी विज्ञान पदवीसाठी साठी यशवंतराव चव्हाण महाराष्ट्र मुक्त विद्यापीठाच्या दूरशिक्षण केंद्रात प्रवेश घेतला आहे.
सिंधुदुर्ग जिल्ह्यातील ११ विज्ञान पदवीधारक शिक्षकांना २०२० साली पदोन्नती देण्यात आलेलेली आहे.
सदर धरणे आंदोलनास सिंधुदुर्ग जिल्ह्यातील विज्ञान पदवीधारकांनी उपस्थित रहावे असे आवाहन महाराष्ट्र राज्य शिक्षक परिषद प्राथमिक विभाग शाखा सिंधुदुर्ग चे जिल्हाध्यक्ष गणेश भिकाजी नाईक यांनी केले आहे.
