तेरवण रामघाट येथे दुचाकीचा ताबा सुटून अपघात

अपघातात दुचाकी चालक ठार तर सहप्रवासी गंभीर जखमी

दोडामार्ग : तेरवण रामघाट येथील वळणावर दुचाकीवरील ताबा सुटून झालेल्या अपघातात दुचाकी चालक ठार झाला तर मागे बसलेला युवक गंभीर जखमी झाला. अपघातात गाडीचेही नुकसान झाले. याप्रकरणी श्रीनिवास नेमनाथ वणकुंद्रे (रा.हेरे , ता.चंदगड) यांनी दिलेल्या तक्रारीनुसार येथील पोलिसात गुन्हा नोंद करण्यात आला आहे. अपघातात मृत्यू पावलेल्या युवकाचे नाव रोहित अशोक गावडे (वय २५) तर जखमी युवकाचे नाव अक्षय मोहन हेरेकर (दोघेही रा.हेरे, ता. चंदगड, जिल्हा कोल्हापूर) असे आहे.
पोलिस निरीक्षक ऋषिकेश अधिकारी यांनी दिलेल्या माहितीनुसार ते दोघे गोव्यातून बजाज पल्सर दुचाकीने (एमएच ०९ सीटी ५४९३) पारगड मार्गे हेरे येथे जात असताना आज पहाटे तीन साडेतीनच्या दरम्यान अपघात झाल्याचा अंदाज आहे. रामघाट येथील वळणाचा अंदाज न आल्याने दुचाकीवरील ताबा सुटून दगडावर चढली व दोघे जमिनीवर कोसळले. त्यात एकाचा मृत्यू झाला तर एकजण गंभीर जखमी झाला.

प्रतिनिधी, कोकण नाऊ, दोडामार्ग