उपमुख्यमंत्री एकनाथ शिंदे अचानक दिल्ली दौऱ्यावर

अमित शहा यांची घेणार भेट, राजकीय चर्चांना उधाण

राज्याचे उपमुख्यमंत्री तथा शिवसेना पक्षप्रमुख एकनाथ शिंदे हे आज अचानक दिल्ली दौऱ्यावर रवाना होणार असून ते केंद्रीय गृहमंत्री अमित शहा यांची भेट घेणार असल्याची माहिती समोर आली आहे. या भेटीचे नेमके कारण अद्याप स्पष्ट झाले नसले तरी विधान परिषद निवडणुकीच्या पार्श्वभूमीवर महायुतीतील जागावाटपावर चर्चा होण्याची शक्यता व्यक्त केली जात आहे.
राज्यात विधान परिषदेच्या १७ जागांसाठी १८ जून रोजी निवडणूक होणार आहे. या निवडणुकीसाठी महायुतीतील जागावाटपाचा फॉर्म्युला जवळपास निश्चित झाल्याची चर्चा आहे. त्यानुसार भाजप सर्वाधिक १२ जागांवर निवडणूक लढवणार असल्याची माहिती असून शिवसेना आणि राष्ट्रवादी काँग्रेसला अनुक्रमे तीन व दोन जागा मिळू शकतात, असे बोलले जात आहे.
मात्र काही जागांवर अद्यापही मतभेद कायम असल्याचे सांगितले जात आहे. शिंदे गटाने सहा जागांची मागणी केल्याची चर्चा असून भाजपकडून चार जागांची तयारी दर्शवण्यात आल्याचे समजते. याच पार्श्वभूमीवर एकनाथ शिंदे दिल्लीत अमित शहा यांची भेट घेऊन आपल्या पक्षाची भूमिका मांडणार असल्याची माहिती राजकीय वर्तुळातून पुढे येत आहे.
या बैठकीनंतर महायुतीतील जागावाटपाबाबत अंतिम निर्णय होण्याची शक्यता व्यक्त केली जात आहे.