श्री दत्तक्षेत्र आशियेमठ येथील पुरातन दत्त मंदिरात अतिरुद्र स्वाहाकार सोहळा
९ दिवस धार्मिक व सांस्कृतिक कार्यक्रम
शोभायात्रेने स्वाहाकाराचा प्रारंभ, समिती अध्यक्ष विलास खानोलकर यांची माहिती
आशिये मठ येथील श्री दत्तक्षेत्र ५६७ वर्षांच्या पुरातन दत्त मंदिरात २५ जानेवारी ते २ फेब्रुवारी या कालावधीत सकलजनकल्याणार्थ अतिरुद्र स्वाहाकार महाअनुष्ठानाचे आयोजन करण्यात आले आहे. यानिमित्त विविध धार्मिक व सांस्कृतिक कार्यक्रमांचे आयोजन करण्यात आले आहे. नेपाळच्या ग्रामीण भागातून संकलित केलेले ११ हजार रुद्राक्ष आणले जाणार असून या रुद्राक्षांवर १५० ब्राह्मण यांच्याकडून रुद्र पठणाने व अखंड अभिषेकाने रुद्रस्वाहाकाराचा केला जाणार आहे. बारा ज्योर्तिलिंग ठिकाणाची माती व पाणी आणले असून मातीची शिवपिंडी तयार करून भक्तांसाठी दर्शनासाठी ठेवली जाणार आहे. या सोहळ्यासाठी शृंगेरी पिठाचे शंकराचार्य हे उपस्थित राहणार आहेत, अशी माहिती अतिरुद्र स्वाहाकार सोहळा समितीचे अध्यक्ष विलास खानोलकर यांनी दिली.
येथील शासकीय विश्रामगृह आयोजित केलेल्या पत्रकार परिषदेत श्री. खानोलकर बोलत होते. आशियेचे सरपंच महेश गुरव, मिलिंद खानोलकर, रवींद्र बाणे, सुनील बाणे, पांडुरंग तुकाराम बाणे, पांडुरंग बाणे, संजय बाणे उपस्थित होते.
रविवार २५ जानेवारीपासून अतिरुद्र स्वाहाकार सोहळ्याला प्रारंभ होणार आहे. या दिवशी सकाळी ६ वा. नित्यपूजा, ८ वा. सूर्य उपासना, ८.३० वा. धर्मधज्वारोहन, नंदीपूजन, ९ वा. प्रार्थना, ९.३० वा. भालचंद्र महाराज संस्थान ते श्री दत्त क्षेत्र आशियेमठपर्यंत शोभायात्रा काढली जाणार आहे. यात १ हजार भाविक सहभागी होणार आहेत. सायंकाळी ६ वा. आशिये गावातील कलाकारांचा आपम महोत्सव होणार आहे. याचे उद्घाटन केंद्रीयमंत्री श्रीपाद नाईक यांच्या हस्ते होणार आहे. यावेळी डिचोली (गोवा)चे आमदार डॉ. चंद्रकांत शेट्ये उपस्थित राहणार आहेत.
सोमवार २६ जानेवारीला सकाळी ७ ते दुपारी १२.३० यावेळेत मंगलाचरण, महासंकल्प, आचार्यादि, ऋत्विक वरण, महान्यासपूर्वक, अतिरुद्र जपानुष्टान प्रारंभ, गुरुचरित्र पारायण, भागवत सप्ताह, चतुर्वेद पारण, दुपारी १२.३० वा. आरती, सायंकाळी ४ वा. नामस्मरण, भजन, ६ वा. धुपारती, रोजापचार सेवा हे धार्मिक विधी होतील. रात्री ८ वा. ह. भ.प. संदीप मांडके यांचे नारदीय कीर्तन होईल. मंगळवार २७ ते शनिवार ३१ या कालावधीत दररोज सकाळी ७ वा ते दुपारी १२.३० यावेळेत अतिरुद्र जपानुष्ठान, दुपारी १२.३० वा. आरती, सायं. ४ ते ६ नामस्मरण, सायं. ६ वा ते रात्री ७.७५ यावेळेत धूपारती, राजोपचार सेवा. या कालावधीत मंगळवार २७ रोजी रात्री ८ वा. महेश केळुसकर, शशिकांत तिरोडकर, गोविंद नाईक, प्राजक्ता सामंत यांचा काव्यरंग कार्यक्रम होईल. बुधवार २८ रोजी रात्री ८ वा. सिंधुदुर्गचे पालकमंत्री नितेश राणे यांचा सत्कार सोहळा होणार आहे. पालकमंत्री नितेश राणे यांचा सत्कार गोव्याचे मुख्यमंत्री प्रमोद सावंत यांच्या हस्ते होणार आहे. यावेळी राज्यसभेचे खासदार सदानंद शेठ हे उपस्थित राहणार आहेत,असे विलास खानोलकर यांनी सांगितले.
रात्री ८ वा. संयुक्त दशावतार सादर होईल. गुरुवार २९ रोजी ८ वा. श्री लिंगेश्वर प्र.भ.मंडळ भरणीचे बुवा विनोद चव्हाण व ब्राह्मणदेव प्रा. भ. मंडळाचे बुवा केंद्रार कदम यांच्यात डबलबारी भजनाचा सामना होणार आहे. शुक्रवार ३० रोजी रात्री ८ वा. ह. भ.प. समाधान महाराज यांचे वारकरी कीर्तन होईल. शनिवार ३१ रोजी दिलीप ठाकूर, राधा जोशी, स्वप्नील गोरे यांचा स्वरंग हा कार्यक्रम होईल. १ फेबु्रवारीला सकाळी ७ ते दुपारी १२.३० यावेळेत अतिरुद्र जपानुष्ठान व ग्रहृयजन, वास्तूयजन रुद्रस्वाहाकार, दुपारी १२.३० वा. आरती, दुपारी १ वा. प्रसाद, दुपारी २.३० वा. भजनीबुवा उदय राणे यांचे भजन, सायं. ४ वा. ब्रह्मवृंदांचा सन्मान, ६ वा. राजोपचार सेवा, रात्री ८ वा. लोकरंग हा कार्यक्रम होईल. २ फेब्रुवारीला सकाळी ७ ते दुपारी १२.३० वा. रुद्रयाग, बलिदान, पूर्णाहुती, उत्तरांग विधी, दक्षिण, आशीर्वाद, दुपारी १२.३० वा. आरती, मंत्रपुष्प, गाऱ्हाणे, दुपारी १ वा. महाप्रसाद, त्यानंतर नागेश पाटील यांचा स्वामीगंध कार्यक्रम होईल. सायंकाळी ६ वा. प. जयतीर्थ मेवुंडी यांचा अभंगरंग हा कार्यक्रम होईल. या सोहळ्यात सर्वांनी सहभागी व्हावे, असे आवाहन अतिरुद्र स्वाहाकार सोहळा समितीचे अध्यक्ष विलास खानोलकर, सरपंच महेश गुरव यांनी केले आहे.
