बिबट्याच्या हल्ल्यात नेरूर-दुर्गवाड येथे दोन बकऱ्या मृत्युमुखी

तालुक्यातील नेरूर-दुर्गवाड परिसरात बिबट्याने पाळीव जनावरांवर हल्ला येथील रहिवासी हाजीम अब्दुल्ला मुजावर यांच्या दोन शेळ्या जागीच ठार केल्या. यामुळे स्थानिक ग्रामस्थांमध्ये भीतीचे वातावरण पसरले आहे.
नेरूर-दुर्गवाड येथे राहणारे मुजावर यांच्या पाळीव बकऱ्यांवर बिबट्याने शनिवारी मध्यरात्रीच्या सुमारास हल्ला केला. या अचानक झालेल्या हल्ल्यात त्यांच्या दोन शेळ्या मारल्या गेल्याने मुजावर यांचे मोठे नुकसान झाले आहे.
या परिसरामध्ये जवळच गाव वस्ती, तसेच धनगरवाडी असल्याने, बिबट्याचा अशाप्रकारे वावर वाढल्यामुळे येथील ग्रामस्थांमध्ये भीतीचे वातावरण निर्माण झाले आहे. स्थानिकांनी व्यक्त केलेल्या मतानूसार, गावातील अनेक जनावरे रात्रीच्या वेळी बाहेर बांधलेली असतात. बिबट्याच्या या हल्ल्यामुळे या सर्व जनावरांना मोठा धोका निर्माण झाला आहे.
गावात वाढलेल्या बिबट्याच्या दहशतीमुळे ग्रामस्थ मोठ्या चिंतेत आहेत. त्यांनी वनविभागाकडे तातडीने या बिबट्याचा बंदोबस्त करण्याची मागणी केली आहे, जेणेकरून भविष्यात होणारे हल्ले टाळता येतील आणि नागरिकांना सुरक्षितता मिळेल.