कार-मोटरसायकल अपघातात चालकाचा मृत्यू

तर पत्नी व दोन मुलगे जखमी,

कारचालकाचे कारसह पलायन

कुडाळ- अज्ञात कारची धडक लागून झालेल्या मोटरसायकलच्या अपघातात मोटार सायकलचालक कृष्णा चव्हाण (वय-४५, रा. नेरूर, आदर्शनगर) यांचे उपचारादरम्यान गोवा येथील रुग्णालयात निधन झाले. तर त्यांची पत्नी व दोन लहान मुलगे हे जखमी आहेत. अपघात झाल्यानंतर कारचालकाने कारसह पलायन केले. या प्रकरणी अज्ञात कारचालकावर गुन्हा दाखल करण्यात आला असून कारचालक आणि कारचा शोध निवती पोलीस घेत असल्याची माहिती पोलीस ठाण्यातून देण्यात आली.
या अपघाताप्रकरणी निवती पोलिस ठाण्यात राधिका चव्हाण यांनी खबर दिली की, गुढीपाडव्या निमित्त म्हापण येथे जत्रा असते. सदरच्या या जत्रेसाठी काल सांयकाळी उशिरा नेरूर आदर्शनगर येथील कृष्णा चव्हाण हे त्यांच्या मोटरसायकलवरून पत्नी राधिका चव्हाण आणि मुलगा कौस्तुभ चव्हाण (वय ११ वर्ष), श्रेयस चव्हाण (वय ८ वर्ष) या सर्वांना घेवून निघाले होते.
यादरम्यान, रात्री ८ वाजण्याच्या सुमारास ते पाट-गांधीनगर येथील लाकूड गिरणीच्या कडील रस्त्यावर आले असता मागून येणाऱ्या एका कार गाडीची त्यांच्या मोटरसायकलच्या उजव्या हँडलला धडक लागली. यामुळे ते सर्वजण मोटरसायकल सहित रस्त्यावर जोरात आढळले.
या अपघातात मोटरसायकल चालक कृष्णा चव्हाण हे गंभीर जखमी झाले. तर पत्नी राधिका, मुलगे कृष्णा व श्रेयस हे ही जखमी झाले. या सर्वांना कुडाळ ग्रामीण रुग्णालयात उपचारासाठी आणण्यात आले. मात्र, कृष्णा चव्हाण यांची हे गंभीर जखमी असल्याने त्यांना अधिक उपचारासाठी गोवा येथे हलविण्यात आले. परंतु, रात्री उशिरा १ वाजण्याच्या सुमारास उपचारादरम्यान त्यांचे निधन झाले.
सदरच्या या अपघाताची माहिती मिळताच घटना पीएसआय सुधीर कदम, पोलीस हवालदार एस. पी. कांबळे, पराग पोकळे यांनी जात तपास पंचनामा केला. तसेच या गुन्ह्याचा तपास पोलीस निरीक्षक एस. आर. राणे यांच्या मार्गदर्शनाखाली पोलीस हवालदार पंढरीनाथ नांगरे हे करीत आहेत. या अपघातास कारणीभूत ठरल्याप्रकरणी अज्ञात कारचालकावर निवती पोलिस ठाण्यात गुन्हा दाखल करण्यात आला असून निवती पोलिस अपघातातील कार गाडी व कारचालक यांचा कसून शोध घेत आहेत.

रोहन नाईक, कोकण नाऊ, कुडाळ