झाडावरुन पडून इसमाचा दुर्दैवी मृत्यू

आचरा वरचीवाडी येथील घटना

आचरा : आचरा वरचीवाडी येथे शुक्रवारी सायंकाळी पाले हसन झाडाच्या फांद्या तोडत असताना झाडावरुन पडल्याने उपचारासाठी प्राथमिक आरोग्य केंद्र आचरा येथे आणले असता कुडाळ वर्दे येथील आनंद वासुदेव वर्देकर वय वर्षे ४८ यांचे दुःखद निधन झाले.याबाबतची खबर सुशांत सुनिल आचरेकर वय वर्षे २५ यांनी आचरा पोलीस स्टेशनला दिली.
याबाबत आचरा पोलीस स्टेशनवरून मिळालेल्या माहिती नुसार मयत आनंद वासुदेव वर्देकर हा खबर देणारे आचरेकर यांच्या कडे माडावरचे नारळ काढण्यासाठी व जंगली झाडांची साफसफाई करण्यासाठी शुक्रवारी गेला होता. संध्याकाळी पाच वाजणेच्या सुमारास सुशांत आचरेकर यांच्या घराजवळील पालेहसनीच्या झाडाच्या फांद्या तोडत असताना झाडावरुन खाली पडला. आचरेकर यांनी स्थनिक ग्रामस्थांच्या मदतीने उपचारासाठी प्राथमिक आरोग्य केंद्र आचरा येथे आणला असता प्राथमिक आरोग्य केंद्राचे वैद्यकीय अधिकारी यांनी तपासून मयत घोषित केले. आचरा पोलीसांनी सदर मृतदेह शवविच्छेदन साठी मालवणला हलवला होता. याबाबत अधिक तपास आचरा पोलीस स्टेशनचे पोलीस निरीक्षक शंकर कोरे यांच्या मार्गदर्शनाखाली पोलीस हवालदार तुकाराम पडवळ करत आहेत.

प्रतिनिधी / कोकण नाऊ / आचरा