गोवा राज्याप्रमाणे महाराष्ट्रातही शासनाने काजू बी ला हमीभाव द्यावा

प्रमोद गावडे सावंतवाडी तालुका खरेदी विक्री संघ अध्यक्ष

प्रति किलो १५० ते १८० रुपयापर्यंत हमीभाव देण्याची मागणी

सावंतवाडी प्रतिनिधी

गोवा राज्यात काजू बी ला हमीभाव मिळाला असून शेतकऱ्यांना प्रतिकिलो १५० रूपये ठरवून देण्यात आले आहेत. महाराष्ट्र राज्य सरकारने त्याही पेक्षा जास्त हमीभाव द्यायला हवा, अशी मागणी सावंतवाडी तालुका सहकारी खरेदी विक्री संघाचे अध्यक्ष प्रमोद गावडे यांनी केली.गेल्या काही वर्षांमध्ये काजू पिकाचा प्रति किलो दर हा घटत आहे. त्यामध्ये वाढ व्हायला पाहिजे ती होत नाही. मागील काही वर्षात 180 रुपये प्रति किलोपर्यंत काजू ला भाव मिळत होता. मात्र सध्या 108ते 120/पर्यंतच हा भाव मिळतो आहे. तोही कमी होत आहे. तो किमान 150 ते 180 च्या घरात मिळायला हवा असे शेतकऱ्यांचे मत आहे. राज्य सरकारने काजूला हमीभाव मिळवून देण्यासाठी चालढकल पणा करून चालणार नाही असे गावडे यांनी सांगितले.

काजू पीक हे नगदी पीक असून ते हमखास मिळते त्यामुळे शेतकऱ्यांचा आर्थिक फायदा होऊ शकतो असे गेल्या काही वर्षांपासून सांगितले जात असल्याने शेतकऱ्यांनी जमीन काजू पीक लागवडीखाली आणली. काजूची मशागत आणि संवर्धन केले. मात्र काजू बी ला आणि बोंडूला भाव मिळत नसल्याने शेतकरी आर्थिक चिंतेत असतात, ही चिंता दूर करण्यासाठी सरकारने पुढाकार घ्यावा अशी मागणी शेतकऱ्यांच्यावतीने गावडे यांनी केली आहे.

राज्य सरकारने काजू बोर्ड निर्माण करण्याची घोषणा केली असून काजू पॉलिसी देखील राज्य सरकारने ठरविली आहे. अर्थसंकल्पात काजूला प्राधान्य देण्यात आले आहे. आता प्रत्यक्षात शेतकऱ्यांना प्रति किलो काजू दराचा हमीभाव मिळायला हवा. गोवा राज्याच्या मुख्यमंत्र्यांनी काजूला हमीभाव दिला आहे. तसा महाराष्ट्र सरकारच्या मुख्यमंत्री व उपमुख्यमंत्री यांनी काजूला हमीभाव देण्यासाठी खास प्रयत्न करण्याची गरज आहे असे प्रमोद गावडे यांनी सांगितले.यंदाच्या हंगामामध्ये अवकाळी पाऊस, निसर्गाचे बदलते वातावरण आणि अति उष्णता झाल्याने काजू पीक धोक्यात आले आहे .तरीही भर उन्हामध्ये शेतकरी काजू शेतीमध्ये जाऊन उरलासुरला काजू गोळा करत आहेत. नैसर्गिक आपत्ती आली आहे. तरीही काजू शेतीवर अवलंबून असणारे बागायतदार शेतकरी पीक घेण्यासाठी पुढाकार घेत आहेत त्यामुळे त्यांना हमीभाव मिळावा. राज्य सरकारने हमीभाव 150 ते 180/रुपयापर्यंत द्यावा, अशी मागणी सावंतवाडी तालुका खरेदी विक्री संघ अध्यक्ष प्रमोद गावडे यांनी यावेळी केली आहे.