रेल्वेतून पडून मालवण तालुक्यातील वृद्धाचा मृत्यू

कणकवली तालुक्यात साकेडी येथील घटना

कणकवली : मेंगलोर रेल्वेने मुंबईहून कणकवलीच्या दिशेने येत असताना रेल्वेतून तोल जाऊन पडल्याने संदीप हरी पारकर (58, चिंदर – भटवडी, मालवण) यांचा जागीच मृत्यू झाला. ही घटना आज सकाळी 6.30 वाजण्याच्या सुमारास कोकण रेल्वे मार्गावर कणकवली तालुक्यात साकेडी – बौद्धवाडी दरम्यान घडली. संदीप पारकर हे रेल्वेतून खाली पडल्याचे रेल्वेतील प्रवाशांनी पाहिले. त्यानंतर याबाबत प्रवाशांनी कणकवली रेल्वे स्टेशनला माहिती दिली. कणकवली रेल्वे पोलीस व कणकवली पोलिसांनी घटनास्थळी धाव घेत पाहणी केली. मात्र संदीप यांना गंभीर दुखापत झाल्याने त्यांचा जागीच मृत्यू झाल्याचे समोर आले. त्यानंतर संदीप पारकर यांचा मृतदेह कणकवली उपजिल्हा रुग्णालयात आणण्यात आला होता. या वेळी सहाय्यक पोलीस निरीक्षक सागर खंडागळे, कणकवली पोलीस स्टेशनचे पोलीस कर्मचारी श्री. देसाई, श्री. माने, कोकण रेल्वे आरपीएफ चे राधेश्याम, प्रदीपकुमार आदींनी घटनास्थळी धाव घेतली होती.

दिगंबर वालावलकर / कणकवली