19 वर्षे वयोगटातील कोल्हापूर विभागीय व्हाॅलीबॉल स्पर्धा पाट हायस्कूलमध्ये संपन्न

राज्याचे शालेय शिक्षण मंत्री दीपकभाई केसरकर यांची उपस्थिती

मुलामध्ये कोल्हापूर तर मुलींमधून सांगली मनपा विजयी

प्रतिनिधी | कुडाळ : क्रीडा व युवक सेवा संचालनालय पुणे द्वारा जिल्हा क्रीडाधिकारी कार्यालय, सिंधुदुर्ग आयोजित कोल्हापूर विभागीय 19 वर्षाखालील शालेय व्हाॅलीबॉल स्पर्धा एस.एल. देसाई विद्यालय पाट हायस्कूलच्या मैदानावर 27 सप्टेंबर 2023 रोजी संपन्न झाली असून या स्पर्धेमध्ये मुलांच्या आणि मुलींच्या गटातून कोल्हापूर ,सांगली, सातारा, रत्नागिरी, सिंधुदुर्ग जिल्ह्यातील प्रथम क्रमांकाचे संघ सहभागी झाले होते.
या व्हाॅलीबॉल स्पर्धेच्या निमित्ताने महाराष्ट्र राज्याच्या शिक्षण मंत्रालयाचे आणि मराठी भाषा मंत्रालयाचे कॅबिनेट मंत्री श्री. दीपकभाई केसरकर उपस्थित होते. एस. के. पाटील शिक्षण प्रसारक मंडळ पाट, पंचक्रोशी पाटचे उपाध्यक्ष श्री.डी.ए.सामंत सर यांच्या हस्ते श्री.दीपकभाई केसरकर यांचा सत्कार करण्यात आला. श्री. दीपकभाई केसरकर यांनी या स्पर्धेला शुभेच्छा दिल्या. यावेळी शिवसेना उपजिल्हाप्रमुख श्री.सचिन देसाई, उभादांडा सरपंच श्री. निलेश चमणकर ,संस्था पदाधिकारी श्री. देवदत्त साळगांवकर , श्री.राजेश सामंत, प्रशालेचे मुख्याध्यापक श्री. कोरे सर, पर्यवेक्षक श्री. हंजनकर सर, माड्याचीवाडी हायस्कूलचे मुख्याध्यापक श्री. रावण सर, सांगली जिल्हा क्रीडाधिकारी जमीर अत्तार, कोल्हापूर व्हाॅलीबॉल प्रमुख संदीप पाटील, महसूल सेवेत कार्यरत असलेले प्रशालेचे माजी विद्यार्थी श्री. रवींद्र भालचंद्र चव्हाण, सिंधुदुर्ग जिल्हा क्रीडा संघ अध्यक्ष श्री.अजय शिंदे, तालुका क्रीडाधिकारी श्री. विजय शिंदे , राष्ट्रीय खेळाडू श्री. अतुल सावडावकर, श्री.राघोजी परब, प्रशालेचे सर्व शिक्षक- शिक्षकेतर कर्मचारी, विद्यार्थी, खेळाडू आणि क्रीडाप्रेमी उपस्थित होते.
19 वर्षाखालील मुलांचे व मुलींचे रोमहर्षक सामने क्रीडा रसिकांना पाहायला मिळाले. या स्पर्धेमध्ये मुलांच्या गटामध्ये कोल्हापूर जिल्ह्याने प्रथम क्रमांक, सांगली जिल्ह्याने द्वितीय क्रमांक ,कोल्हापूर महानगरपालिकेने तृतीय तर सातारा जिल्ह्याने चतुर्थ क्रमांक मिळवला.मुलींच्या गटांमध्ये सांगली महानगरपालिकेने प्रथम तर सांगली जिल्ह्याने द्वितीय क्रमांक मिळवला .रत्नागिरी जिल्हा तृतीय क्रमांकाचा मानकरी ठरला तर सातारा जिल्ह्याने चतुर्थ क्रमांक पटकावला.
सर्व यशस्वी संघाना, पंचाना, मान्यवराना, संस्थेतर्फे सन्मानचिन्ह आणि चषक देऊन गौरविण्यात आले . यानिमित्ताने राज्यस्तरीय, राष्ट्रीय स्तरीय खेळाडूंचे रोमहर्षक आणि चुरशीचे सामने पाहण्याची संधी पंचक्रोशीतील विद्यार्थी आणि क्रीडा रसिकांना मिळाली . स्पर्धा यशस्वी करण्याकरिता गणेश चतुर्थीची सर्व शाळांना सुट्टी असताना पाट हायस्कूल स्टाफ आणि माजी विद्यार्थी यांनी उत्तम सहकार्य केले .स्पर्धा यशस्वी करण्याकरिता पंचक्रोशीतील विविध दात्यांचे सहकार्य मिळाले .
पंच म्हणून अजय शिंदे,अमित हर्डीकर, अजित जगदाळे, हरेश वाघाटे, नेव्हील गोन्सालविस, महेश शेडबाळे,सुरज पवार, श्रीकांत पाटील, ईर्शाद शेख ,राजेश गोवेकर, सुशांत खोत, श्रीनाथ फणसेकर, अतुल सावडावकर, जमीर अत्तार, आसिफ मुल्ला यांनी काम पाहिले.या संपूर्ण स्पर्धेचे सूत्रसंचालन शिक्षक प्रतिनिधी श्री.साळसकर सर यांनी केले.
तीन दिवस चाललेल्या या कोल्हापूर विभागीय व्हाॅलीबॉल स्पर्धा पाट हायस्कूलच्या मैदानावर थाटामाटात संपन्न झाल्या.

प्रतिनिधी, कोकण नाऊ, कुडाळ.